Shillong, Jylliew 24 : U Symbud Myntri Rangbah Bah Prestone Tynsong ha ka sngi Nyngkong, ula ong ba ka shong ha u Myntri Rangbah Conrad K Sangma ban shim ia ka rai la un bujli kam ne em hapdeng ki Myntri ha ka Sorkar.
Haba kyntait ban kynthoh shuh shuh halor kane ka kam, u Bah Prestone ula ong “Ngam don jingtip eiei ia kane namar phi iohi….haba iadei bad ka kam bujli kami a ki Myntri, ka shong ha ka rai jong u Myntri Rangbah. Namar kata, ngam don eiei ban ong ia kata, ka shong beit ha u Myntri Rangbah ban shim ia ka rai”.
Ula kynthoh ia kane halor ka jingkylli la kan don ne em ka jingbujli kam ia ki Myntri namar ka Sorkar MDA kan sa pyndep shen ia ka jingshakri ba arsnem shiteng.
Ha kajuh ka por, u Bah Prestone, uba dei ruh u President ka National People’s Party (NPP) ha Meghalaya, ula ong ba ka party kan dang ban iakren halor ki kam ba iadei bad ka jingjied ia ki kyrtong sha ka elekshon MP Rajya Sabha.
“Ngin dang ban iakren halor kane ka kam” ula ong haba kyntait ban kynthoh ia ki khubor kiba mih ha ki kot khubor ba ka NPP ka lah ban jied ia u James K Sangma kum u kyrtong.
