Ri-Bhoi, Nailar 02 : Kawei ka Maruti 800 ba don u nombor ML04-B-6931, kala leit rung shakhrum jong ka trok kit siej ba don u nombor ML10-M-1007 bad ha kane ka jingjia, u nongniah jong ka Maruti kaba la phra ka khmut, ula mynsaw jur.
Kane ka jingjia kala jia ha ka por 8 baje ha ka miet sngi Saitjain ha ka surok service lane ba don ha ka shnong Mawdiangum. Kane ka Maruti ka dei kaba kit sohtrun-kaba dang thmu ban wan kiew sha Shillong.
Ki Pulit ki iathuh ba kane ka Maruti kala leit tynrah hi ia kane ka trok katba ka dang pynieng harud jong ka surok service lane. La ong ba ka daw jong ka jingjia, ka dei namar ba u nongniah jong ka Maruti ula shoh samthiah bad khlem lap ba iohi ia kane ka trok.
Ia une uba mynsaw la pynkit noh sha ka Civil Hospital ha Nongpoh ba un ioh jingsumar. Ki Pulit ki dang pynlong ia ka jingtohkit halor kane ka jingjia.
