Shillong, Jymmang 19 : Ki kompani Umphniang kila pyntip ba kam shym don satia kano kano ka jingpyrrkhing ia ka jingsam umphniang kali ha Meghalaya bad ka jingshalan ne pynpoi ia ka petrol, diesel bad LPG ki dang iai bteng khlem kano kano ka jingthut ha baroh kawei ka Jylla.
Ha ka kyrwoh bala pynlait ha ka sngi Ba-ar, ka Indian Oil, Bharat Petroleum Corporation Limited bad ka Hindustan Petroleum Corporation Limited, kila ong ba kila pynthikna “ban nym don jingthut ha ka jingioh ia ka petrol (MS), Diesel (HSD) bad Liquified Petroleum Gas (LPG) ha baroh kawei ka Jylla Meghalaay” wat hapdeng ki jinglong jingman ki bym ithikna ha ka pyrthei kaba ktah ia ka jingshalan ia ka umphniang bad gas.
Kine ki kompani kila pyntip ba kila pynkhreh bha ialade ban pynneh khlem ka jingthut ia ka jingpynpoi ia ka umphniang lyngba ki terminal ba ka don, ki depot, LPG bottling plant bad ki retail outlet ha kylleng ka Jylla.
Kat kum ka jingong kine ki kompani, ka jingtreikam jong baroh ki retail outlets (petrol pump) ki dang long beit kumba ju long.
“Ka jingai umphniang ka dang iaid beit iaid ryntih ha baroh ki petrol pump” ong ka kyrwoh.
Ki kompani ki la ong ba ki stock ki dang long kiba biang bad kiba ju pyndap man ka por.
Ka jingsam ia ka LPP ruh kam shym la shah ktah. “Ka jingsam LPG ia ki Longiing ruh ka dang iaid beit kumba ju long ha baroh kawei ka Jylla Meghalaya” kila bynrap.
Kila kyntu ia ki paidbah ba kim dei ban khuslai bad ba kin iathied lypa ia ki mar da ka jingtieng haba kyntu ia ki paidbah ba kin shaniah ha ki tyllong khubor kiba lah ban pynthikna.
