Guwahati, Nohprah 27 : Ka United Liberation Front of Asom (ULFA) kaba kyrshan ia ka jingiakren iasuk, kala poi ha Delhi bad la khmih lynti ba kan iasoi ia ka soskular iasuk bad lai liang mamla bad ka Sorkar India lem bad ka Sorkar Assam hashuwa ban kut u bnai Nohprah.
Kat kum ka khubor, hadien ba iasoi ia ka soskular iasuk bad ka kynhun, kiba bun ki ishu la khmih lynti ba kin urlong noh.
Kane ka kynhun ka ULFA kaba wan sha ka miej iakren iasuk kala dawa ban wanrah jingkylla lyngba ka Riti Synshar bad ka Synshar Khadar ha kaban iada ia ka snap ba kyrpang bad ka spah mariang jong ki paid trai Jylla ka Assam kynthup ia ka khyndew ka shyiap.
Ka Sorkar India ha u bnai Iaiong kala phah ia ka draft agreement. Shuwa kane,kala don ka jingiakren hapdeng ki arliang mamla ha Delhi kaba la long ha u bnai Nailar.
Ka kynhun ULFA ka dei kaba la pynkha ha u Iaiong 1979 hadien ka jingiakhih pyrshah ia ka jingwan rung kyrthep ki nong Bangladesh (mynshuwa ka East Pakistan).
Kane ka kynhun kala pait arliang ha u Rymphang 2011 ha kaba ka kynhun ba ialam da u Arabinda Rajkhowa kala iehnoh ia ki kam umsnam bad mynjur ban wan sha ka jingiakren iasuk bad ka Sorkar. Katkba ka kynhun ba ialam da u Paresh Baruah bala ai kyrteng ialade ka ULDA-Independent, ka long pyrshah bha ia ka jingiakren iasuk.
“Ki jingkakren la khmih lynti ba kan sdang bad ka Sorkar India kan sa rai ia ka sngi ha kaban iasoi ia ka soskular. Kane ka lah ban urlong hashuwa ban kut une u snem ba mynta” ong ka tyllong khubor.
U Anup Chetia, General Secretary ka ULFA bad u Sasadhar Choudhury uba dei u Foreign Secretary, ki dei ban iakynduh ia u AK Mishra, u Ksiang jong ka Sorkar India ban iakren pynbeit halor ka soskular.
