Imphal, Jylliew 10 : Ka Commission of Inquiry ba lai ngut ki Dkhot bala thung da ka Sorkar Pdeng, kala poi ha ka sngi thohdieng ha Manipur ban tohkit ia ki jingjia iaumsnam bad ki kam pyntriem na ka thma iapher Jaidbynriew.
Ka MHA kaba la thung ia kane ka Commission ha ka 4 tarik u Jylliew, kala bthah ia ka kynhun ban tohkit bad aiti ia ka kaiphod sha ka Sorkar Pdeng kham kloi kat kaba lah hynrei ym dei ban slem ia ka hynriew bnai naduh ba ka sdang ban shong tohkit.
Kane ka Commission ka dei kaba khlieh da u Chief Justice barim ka Guwahati High Court Ajal Lamba, uban sa sdang noh ia ka jingtohkit halor ki kam pyntriem kiba la jia naduh ka 3 tarik u Jymmang.
Kiwei pat ki dkhot ka Commission ki dei u IAS ophisar bala shongthait Himanshu Shekhar Das bad u IPS Ophisar bala shongthait Prabhakar Aloka.
Ka Commission kan tohkit ia ki daw bad ka jingsaphriang ki kam iaumsnam bad ki kam pyntriem pyrshah ia ki jaidbynriew bapher bapher, kaba la jia ha Manipur naduh ka 3 tarik Jymmang bad hadien kane. Kan tohkit ruh halor ka jingdon ki jing bym trei hok ia ka kam da ki bor Sorkar kaba lam sha kane ka jingkynad kaba jur.
Kane ka thma iapher jaidbynriew ha Manipur kala shim haduh 105 ngut ki mynsiem briew bad pynmynsaw ia palar 320 ngut.
