Shillong, Naiwieng 05: Ka State Level Youth Exchange Programme, 2024, kala sdang hynnin ka sngi Nyngkong ha Convocation Hall, NEHU, Shillong campus ha kaba palat 500 ngut ki samla kiba don sap na ki 12 District jongka Meghalaya, kila iashimbynta ha kane ka prokram kaba shi taiew.
Ia kane ka prokram mynta ka kynti la pynlong halor ka phang ‘Today’s Youth-Tomorrow’s Leader’, kaba la sdang naduh ka 4 haduh ka 7 tarik u Naiwieng, bad la pynlong ia ka da ka Directorate of Sports & Youth Affairs jong ka sorkar jylla.
U Director ka Sports and Youth Affairs D.D Shira, ula plie ia katei ka jingialang kum u kongsan bad ula dap da ka jingkmen ban iohi iaka jingwan iashimbynta ki samla na kylleng ki District haba banjur iaka jingdonkam ban saindur ia ki samla bad ban tei iaka jinglong paralok hapdeng ka jong ki.
“Kum kane ka prokram kan long ka rynsan ia ki samla ba kin iaroh bad ban ia sam markylliang iaka riti dustur bad ia ka kolshor na ki jaidbynriew bapher bapher jong ka jylla” ula ong.
Ha kane ka prokram ki samla kin shah jied ban iashimbynta haka state level, bad ki nongjop ha ka state level kin ioh ban leit mihkhmat ia ka jylla Meghalaya ha ka North-East Level, National Level bad International level. Ha kane ka prokram yn pynlong ruh ia ki jingiakob bapher bapher, ki jingiasyllok bad ka jingwad ia ka sap ka phong.
Lah ban kdew ba palat 24 ngut ki samla kila shah jied ban leit iashimbynta haka International Empower Youth Programme ka ban long ha Jakarta, Indonesia.
Ka Trewasara Hadem kaba na Jowai, kaba la shah jied ban leit sha katei ka International Empower Youth Programme ha Jakarta, Indonesia, kala pynpaw ia ka jingsngewnguh ia ka tnad Sports and Youth Affairs ka sorkar jylla kaba la pynlong ia kane ka prokram kaba kongsan bad kala pynpaw ba ka jingiashimbynta ka jongka ha ka District Youth Exchange program 2023 kala wanrah iaka jingkylla ha ka jingim ka jongka bad kaba la pynlah ruh ia ka ban long ka sur na ka bynta ka bha ka miat bad ban ai mynsiem ia kiwei.
U Shanlang Kioo Laloo na Shillong, uban leit sha Jakarta, Indonesia, ula batai ia ka jingiaid lynti ka jongu da kaba iashimbynta haka District Youth Exchange Programme bad ym shim la poi pyrkhat ban shah jied ban iashimbynta haka State Level 2023 kaba la long ha u Risaw bad ula ioh iaka jinghikai kaba kongsan ha kaba iadei bad ka kolshor bad kiwei kiwei.
U Shanlang ula pynpaw ia ka jingsngewnguh ia ka tnad kaba la jied ia u ban iashimbynta haka National Youth Exchange program kaba la long Arunachal Pradesh bad ula ong ba lyngba katei ka prokram ula ioh iaka jinghikai ban don ia ki sap ban kylla long nongialam bad kiwei kiwei.
Ki heh ki hain kiba la iashimbynta ha katei ka jingialang ki kynthup ia ki Assistant Director Sports and Youth Affairs u Bah P. B. War Nongbri bad u Bah K Passah, Fr. Michael Makri, Bah D Rapsang, ki District Sports Officer, bad ki heh jongka NYK bad NSS.
