Tura, Risaw 12: Ka jingialehkai football ha Adokgre ha North Garo Hills kaba la.long ha ka sngi Palei kala kylla pynban kum kaba pynioh pang ia ki 86 ngut ki riewshimet hadien ba kila bam ia u shana uba die ha surok.
Ia une u jingbam la khleh bad die da u nongdie uba don shabar jongka Stadium ha ka por ba dang ialehkai. Khlem da tip ia kaei kaban wan jia ia ki, bun kila bam ia utei u shana ban pynkdang ia ki kumba 1 kynta shiteng katba dang iaid ka jingialaehkai.
Tang hadien katto katne bun kila sdang ban ujor ba pang bad suh kpoh bha, prie bad kingkhlieh.
Ia kitei ki riewshimet kiba la kem pang la pynkit noh mardor sha Civil Hospital. Katba kiba bun na kitei la ioh iaka jingsumar, hynrei ia kito kiba la kham shitom bha la phah kit noh ia ki sha ki hospital kiba don ha Goalpara, Dudhnoi, bad Boko.
Hynne ka sngi saitjain, 6 ngut ki nongpang kiba la sumar shabar ka jylla la pyntip ba kila lait na ka jingma.
Haba iakren bad Ka Shlem, u Deputy Commissioner ka North Garo Hills u Abhinav Kumar Singh ula pyntip ba ki bor pyniaid district kila dep ban kurup ia ki jingbam kiba la khleh ha u shana bad la phah ia ki sha Shillong ban leh ia ka test.
“Shisien ba ngi lah ioh iaka result, ngin sa shim shuh shuh ia sienjam kiba tyngeh” ula bynrap.
