Shillong, Jylliew 15: U Myntri ka Sorkar Pdeng uba khmih ia ka Tnad Agriculture & Farmers Welfare bad Rural Development, u Shivraj Singh Chouhan, hynne ka sngi ula pynbna ba u Myntri Rangbahduh ka ri u Narendra Modi un sa pyllait noh ia ka Installment kaba T.20,000 Klur lyngba ka PM-KISAN.
U Narendra Modi un leit jngoh ia ka Varanasi ha ka 18 tarik u Jylliew na ka bynta ban pyllait ia ka Installment kaba 17 jongka PM KISAN Scheme sha ki nongrep bad yn ai iaki certificate sha palat 30,000 tylli ki Self-Help Groups kum ka Krishi Sakhis.
Ia katei ka prokram yn pynlong da ka tnad Agriculture and Farmers Welfare jong ka ri ha ryngkat ka jingiatreilang bad ka sorkar Uttar Pradesh. Ha katei ka jingialang yn don lang ki heh ki haiñ kiba kynthup ia u Lat ka jylla Uttar Pradesh, u Myntri ka sorkar pdeng uba khmih iaka rep ka riang u Shivraj Singh Chouhan, u Myntri Rangbah ka Uttar Pradesh u Yogi Adityanath bad kiwei kiwei ki myntri sorkar ka Uttar Pradesh.
U Myntri Sorkar ula pyntip ba ha ka 18 tarik u Jylliew, ka jingjop jong ka jingshim ia ka Resolution ban kyntiew ia ka ri India ryngkat bad ka jingkiew shaphrang jong ki nongrep kan sa sdang noh. Namar katei ka sngi bun ngut ki myntri sorkar jong ka sorkar pdeng kin leit jngoh ia ki 50 tylli ki KVK ban iakren bad ki nongrep bad ban pynsngewthuh ia ki halor ki skhim bapher bapher jong ka tnad.
U Shivraj Singh Chouhan ula ong, kumba 2.5 klur ki nongrep kin iasnohktilang ha katei ka jingialang ha kylleng jong ka ri India. 732 tylli ki Krishi Vigyan Kendras (KVK), palat 1.0 Lak ki Primary Agricultural Cooperative Societies bad 5.0 Lak ki Common Service Centres (CSC) ha kylleng jong ka ri kin iashimbynta lang ha katei ka prokram ban pynsngewthuh ia ki nongrep.
Ha Meghalaya, u Satish Chandra Dubey, Myntri Khynnah uba khmih ia ka tnad Coal, Mines un iashimbynta ha katei ka prokram ka ban long ha ICAR, Umiam Meghalaya.
U Shivraj Singh Chouhan ula ai khublei ia u Myntri Rangbahduh ka ri halor ka jingpynkhamti ha u ia ka jingkitkhlieh ia ka tnad kaba kongsan kum ka rep ka riang bad ula ong ba ka rep ka riang ka long kaba kongsan bha na ka bynta ban pynurlong iaka ri India kaba kiew shaphrnag bad ula ong, ruh baka rep ka riang ka long kum u mawnongrim jong ka ioh ka kot ka ri bad wat haduh kine ki sngi kiba bun ki lad aikam aijam kila wan lyngba ka rep ka riang.
Ula ong ba ka sorkar pdeng hapoh ka jingialam u Narendra Modi kala buh hakhmat eh ia ki nongrep bad kala shim bun ki sienjam bad wat mynta ruh u Narendra Modi haba ula shimti biang ia ka kam Myntri Rangbahduh ka ri ula soi nyngkong eh 17th Installment jongka Kisan Samman Nidhi kaban pyllait sha ki nongrep.
Ia katei ka PM KISAN, kaba kot palat iaka T.20,000 Klur yn sam sha palat 9.26 klur ngut ki nongrep kiban ioh jingmyntoi, ha kaba u Myntri Rangbahduh ka ri yn shu nion shisien ia u budam na Varanasi.
