Shillong, Lber 07: U Myntri Rangbahduh ka Ri u Narendra Modi hynne ka sngi Palei, u la plie paidbah ia bun tylli ki projek kam pynroi ba kot haduh T.6400 haka por ba u leit jurip sha Srinagar bad Jammu and Kashmir.
Lyngba ka Swadesh Darshan Scheme ka tnat Ministry ka Tourism ka Sorkar India, U Myntri Rangbahduh u la ai burom ruh ia 3 tylli ki project naka bynta ki nong shong shnong ka Jylla Meghalaya.
Haba kren ha kane ka sngi, u Myntri ka tnat Tourism ka Meghalaya Bah Paul Lyngdoh u la ong ba u Myntri Rangbahduh ka Ri Narendra Modi, u la shim bynta lyngba ka kor internet (Virtually) ban plie ia bun tylli ki Projek hapoh ka Ri bad 3 tylli ki Projek kidei hapoh Meghalaya kata ka Krangsuri Falls, ka Mawmluh Experiential Centre bad ka Sohra Waterfalls trails.
U Bah Paul u la ong ba ka Krangsuri Project kadei kaba la pyndep bad shen ka Sorkar kan sa pyndep sa ia 2 tylli ki project.
U la ong baka tnat Tourism kan iatreilang bad baroh ki kynhun naka bynta ban pynthikna ba ki kam kin iaid beit iaid ryntih ban pyndep sa ia kiwei ki Projek ba dang.
