SHILLONG, Kyllalyngkot 14: U MLA ka South Shillong u Bah Sanbor Shullai hynne ka sngi ula plie paidbah iaka jingai kyrteng thymmai ia ki 6 tylli ki surok kiba hap haka shnong Madan Laban & Riat Laban.
U Bah Sanbor Shullai ryngkat ka jingdonlang u Rangbah Shnong Bha Iostar Sun, u Secretary Shnong Bah RG Marbaniang, ki nongshong shnong bad kiwei kiwei kila plie ia ki jingthoh jong kitei ki surok kiba la ai kyrteng thymmai.
Kitei ki 6 tylli ki surok kiba la ai kyrteng thymmai ki kynthup iaka Babu Hajim Kissor Sing Nongbri Road, Phinton Mylliemngap Road, Nomiwell Rynjah Road, Dennis Dunn Road, Moshondro Roy Road bad Brington Mylliemngap Road.
U Bah Iostar Sun ula ong ba ka shnong kala phah ia ka jingtyrwa la bun snem sha ka sorkar ban pynkylla noh ia ka kyrteng jong ki surok ha ka shnong namar ba la ai kyrteng ia kitei ki surok sha ki bym dei Khasi bad ula pynpaw iaka jingsngewnguh iaka jingshimkhia u Bah Sanbor uba long u Myntri Sorkar ba la lah ban pynkylla thymmai noh ia kitei ki surok ban pynsahnam ia ki riewrangbah ka shnong kiba la noh synniang iaka shnong bad iaka jylla.
Haba kren haka jingialang u Bah Sanbor ula ong, kum u MLA ula trei shitom ban wanrah ia ki kam pynroi haka Constituency bad ula ai jingshakri baroh 24 kynta ia ki paidbah bad ula pynpaw iaka jingbynniaw ba ki don katto katne ki politishan bad ki heh ophisar sorkar ki trei tang na ka bynta shimet bad shi ïing bad kim shim la noh synniang eiei iaka imlang sahlang.
Ula ong, ha ka elekshon MDC 2019 ha Laban la shem ba na ki 100 ngut ki nongthep vote kila don tang 42 ngut ki nongthep vote kiba la leit ban thep vote bad ula kyntu ia ki paidbah ba kidei ban pyndonkam ia ka hok ka jongki da kaba mih nala iing ban leit thep vote ha ka elekshon MLA 2023 hynrei ym ban ialeitkai ne leit bamkhana ha ka sngi thep vote.
