Shillong, Nohprah 11 : U Myntri ka sorkar jylla Bah Sanbor Shullai uba long ruh u MLA ka South Shillong haka sngi Saitjaiñ ula plie paidbah ia ka Working Women’s Hostel jong ka Garo Welfare Society ha Rilbong, Shillong kaba la tei ha ka jinglut jingsep kaba kot sha ka T.4.50 Klur.
U Bah Sanbor Shullai haba kren ha ka jingialang, ula ai khublei ia ki ophisar ka tnad Revenue khamtam ia u Myntri Sorkar barim ka jylla u Prof RC Laloo bad ia u Myntri ka tnad Social Welfare Bah Kyrmen Shylla bad ia ki nongialam shnong kiba la ai ka jingkyrshan ban pynthikna ban lah ban pynieng ia kane ka Hostel naka bynta ka bha ka miat jong ki paidbah.
Ula iathuh ba ha ki por kiba mynshwa, katei ka jaka kadei kaba la shu ieh shrah kumto ha kaba ki briew kila pynlong ia katei ka jaka kum ka jaka ban leh ia ki kam sniew bad kum ka jaka dih hynrei mynta daka jingtei iaka Hostel kala wanrah iaka jingshngain bad kala long ruh ka jingmyntoi ia ki paidbah ka thaiñ.
Ha ka jingplie ia kane ka Women’s Hostel la donlang u Secretary jong ka tnad Social Welfare Bah IW Ingty, ki heh ophisar ka tnad Social Welfare, ki nongialam jong ka Garo Welfare Society, ki Rangbah Shnong ka thaiñ Laban bad kiwei kiwei.
U Bah Sanbor ula sam ruh da ki jingai sngewbha sha kito kiba roh kiba la donkti ha kaban pynurlong ban ioh tei ia katei ka Hostel.
