Shillong, Iaiong 4: U Myntri Sorkar uba dei ruh u nongthaw ain jong ka 19 South Shillong u Bah Sanbor Shullai, mynta ka sngi Saitjain u la plie paidbah ïa ka surok bypass kaba 185 mitar kaba ïaid nadien jong ka NEFA Secretariat, Cantonment Area haka jinglut kaba kot sha ka 3. 36 klur tyngka.
Ha kane ka sngi ba plie la donlang ruh naduh ka Rani Jibang, DRC jong ka sorkar Arunachal Pradesh, nangta u Superitending Engineer ka PWD, ki heh pulit, ki nongialam shnong bad kiwei kiwei.
Haba kren kum u kongsan u Bah Sanbor u la ong, “Ïa kane ka skhim la sdang da ka sorkar MDA hapoh ka jingïalam u Myntri Rangbah ka Jylla u Conrad K Sangma, u Symbud Myntri Rangbah ka Jylla u Bah Prestone Tynsong, bad ma nga hi,” la ong u bah Shullai.
“Ngi la ïakren ïa kane ka mat na ka por sha ka por, bad ngi la shim khia lang, bad mynta ka sngi ka jingangnud ka la urlong.”
U Bah Sanbor Shullai u la pynpaw ka jingsngewnguh ïa ki paidbah ka 19th South Shillong constituency bad ïa ki heh ophisar jong ka tnad PWD kiba la shim khia haduh ban da pyndep ïa kane ka ka.
Katei ka jaka ba shna ia katei ka projek ka dei jong ka sorkar Arunachal Pradesh, bad ka sorkar MDA ka la leit sha ka sorkar Arunachal Pradesh lyngba ka DRC na ka bynta ban pynbha ïa katei ka surok.
Na ka liang u Executive Engineer ka Shillong Central Division PWD u Bah S Lytep ha ka jingkren maitphang u la ai ka jingiaroh ïa baroh kiba la don bynta ban pynlong ïa kane ka projek ba kan dep kloi.
U la pynpaw ba kane ka kam ka shimpor kumba shi snem tam bad ha ka por bas dang ïa kane ka kam ka tnad PWD ka kynduh shibun ki jingeh.
Na ka liang ki bor ba dei peit kila khmih lynti, ba kin pynlong One Way ïa kane ka surok bad ki kali kiba donkam ban leit sha Umshyrphi baroh ki hap ban ïaid na kane ka bye pass bad tang ki kali kiba leit sha Anjeeli bad Iewduh kin ïaid beit na ka surok rim ban lait na ka dheng kali.
