Shillong, Nohprah 15: U myntri ka tnat ka koit ka khiah ka jylla u James P.K Sangma hynne ka sngi u la plie ïa ka Cancer Wing ha Civil Hospital Shillong kaba la synñiang da ka Department of Atomic Energy bad u la plie ruh ïa ka Meghalaya Mission Cancer Prevention and Early Detection.
Haba kren ha kane ka sngi u James Sangma u la ong ba ka jingplie ia kane ka Cancer Wing ha Civil Hospital kadei ka sngi kynmaw iaka jylla baroh kawei namar kane ka jaka sumar bampong kadei ka jingangnud jong ki paidbah ka jylla.
U James u la iathuh ka sorkar jylla kala pyntreikam iaka First Cancer Care (FCC) Project ka ba dei lang bad ka Cancer Wing bad kane kan wanrah jingmyntoi iaki paidbah khamtam naka bynta ban sumar iaki ba ioh jingpang bampong.
U la ong ba ka jingplie iaka Cancer Wing kan iarap ruh iaka Hospital ban buddien bad ban lum jingtip iaki ba ioh pang naka bynta ban pynkhreh iaki lad jingsumar hashuwa ban jur ka jingpang namar kane kan iarap iaki paidbah ban tip lypa iaki jait jingpang.
U la ong ba ka donkam ïa ka rukom treikam kaba kyrpang bad ka jingwanrah ïa ka First Cancer Care (FCC) ka long ban lap kloi ïa kane ka jingpang bad ban ai ka jingsumar kaba biang ka ban ïarap ïa kiba shah ktah bad kane kan pyllait im ïa kiba bun.
Nalor kane u myntri ka tnat ka koit ka khiah u James Sangma u la ong ba ka sorkar ka don ruh ka thong ban pyntreikam ruh iaka Cancer Wing ha Tura naka bynta ka jingmyntoi ki paidbah ka thain rilum Garo.
U James u la ong ruh ba ka sorkar ka kyntu iaki paidbah ban iatreilang bad ka sorkar khamtam bad ka tnat ka koit ka khiah bad ka Village Health Councils naka bynta ban lum jingtip haba iadei bad ka jingdon ki briew kiba suba don jingpang bampong khnang ban ioh ki lad jingsumar haka por ba biang.
Ha kane ka sngi u myntri ka tnat ka koit ka khiah u James Sangma u la pyllait paidbah ruh iaka kot ba la ai kyrteng ‘Meghalaya Mission Cancer Prevention and Early Detection’ bad ki paidbah ki lah ruh ban shu Download ia kane naka Website jong ka State Cancer Society of Meghalaya.
