Shillong, Nohprah 28: U MP ka Rajya Sabha u Dr WR Kharlukhi ula plie ia ki mawkyndon jong ka Caroline Colony kiba jrong haduh 230 mitar bad kaba iar 5 phut bad kaba don haduh 543 tylli ki mawkyndon ha Jowai, West Jaintia Hills ha ka sngi Saitjain.
Ia ka projek la bei tyngka lyngba ka MP’s Local Area Development Scheme (MPLADS) 2023‑2024 ha ka jinglut kaba kot T.10 lak.
Haba ai jingkren, u Dr Kharlukhi ula ong, “Ki nongshong shnong jong ka Caroline Colony kim donkam ban ai khublei ia nga, kadei ka kamram ka jong nga ban shakri ia ki paitbah kiba la ai ka jingshaniah ia nga bad kiba la noh synniang sha ka jingroi ka jong nga kum u nongmihkhmat”.
U Waheh Shnong ka Caroline Colony u Bah Embhahlang Lyngdoh, ula pynpaw ka jingsngewnguh ia u Dr Kharlukhi uba la pynurlong ia ka jingkyrpad kaba lah slem bha jong ka shnong.
Ula pynpaw ba ka jingdon kane ka lynti iaid kjat kan iarap shibun ban wanrah ia ka jingshngain bad ban pynsuk ia ka leit ka wan jong ki nongshong shnong.
U MS Lhuid, Nongaibuit ka Caroline Colony, ula pynpaw ia ka jingkongsan ban don ia ka rukom pynwandur kaba biang bad ka jingbhah ia ka jingdon jingem ban pynthikna ia ka jingskhem bad jingneh slem ia ka lynti iaid kaban ai jingiarap ia ki nongshong shnong bad ia ki nongwankai.
Katkum ka jingong ka jongu, la khmih lytni ba kane ka lynti iaid kjat kan pynsuk ia ki nongiaid bad ban pynbha shuh shuh ia ka leit ka wan ha katei ka thain, khamtam ha kaban pyndap pynbiang ia ka jingduna ha ka shnong
