Nongstoiñ, Risaw 6: U MLA ka Nongstoin Bah Macmillam Byrsat hynne ka sngi palei, ula plie ia u mawnongrim jong ka “Vocational Training Centre” jong ka Nongstoin Social Service Society (NSSS),ka ban long ka shlem pyntbit ia ka sap ka phong jong ki samla ba kin lah ban ieng hala ki jong ki kjat da kaba pyndonkam ia ka sap ba ki don.
Ia kane ka jaka ai jinghikai la mang ban pyntrei naka Chief Minister’s Special Development Fund 2021-22 ha ka jingpang tyngka kaba kot T. 35 lak.
U Fr Rolandus Lyngdoh President ka NSSS haba ai jingkren, u la ong ba ïa katei ka jingtei la ïoh pisa na ka Chief Minister’s Special Development Fund 2021-22, lyngba ka jingïarap jong u MLA jong ka Nongstoiñ u bah Macmillan Byrsat.
U Rev Anselm Nonglang Diocesan Administrator Diocese Nongstoiñ, u ba la long ruh kum u symbud kongsan, u la ong ba ka balang ka don la ka thong ban shakri ïa ki paidbah ym tang ban sharai ha ka jinglong mynsiem da kaba pyndep ïa ka baptisma ne ban shu ïalap tang ïa ka Ktien U Blei. Hynrei ban khmih ruh ïa ka jingdonkam jong u khun bynriew haba ïadei bad ka doh.
Na ka liang u kongsan haba ai jingkren, u la ïaroh ïa ka balang katholik da kaba ong, “Nga kren ïa ka jingshisha ba wat haba ki khristan ki don tang kumba 2 percent ha ka ri India baroh kawei hynrei, ka jingnoh synñiang jong ki khristan lyngba ka balang katholik ha ka ri baroh kawei ka la kot sha ka 40 ne 50% haka pule puthi”.
Ha kaba ïadei bad ki briew kiba duna ha ka bor pyrkhat, u la ong, “Kam dei ïa ngi ban ñiew ïa kiwei pat ba ki don ia ki jingduna. Hynrei baroh ngi long kiba duna bad ka dei ruh ïa ngi ban don ïa ka mynsiem ka ban pyndem, namar da ka jingpyndem ngin jop ïa ki jingeh”.
Haba ïadei pat bad ka jingkypad jong ka NSSS ban siang rong noh ïa ka surok kaba ïaid lyngba ka surok PWD ka ban poi sha NSSS, u MLA u la kular ban sa phah leh noh shen ha kine ki sngi ban wan.
Ha kane ka sngi la rakhe ruh ïa ka, ‘World Mental Health Day 2022’, kaba dei ka sngi kyrpang jong kiba duna ha ka pyrkhat pyrdaiñ.
