Nongstoin, K’lyngkot 13: “Kane kan dei ka sngi ka ban sah jingkynmaw ha kaba ia ki jingphohsniew ba la slem jong phi la pynurlong”, ong u bah Macmillan Byrsat Chairman MLA jong ka Nongstoin Constituency, haba ai jingkren kum u kongsan ha ka jingplie ia u mawnongrim ban kyntiew kyrdan noh ia ka Nongkynjang Sub Center sha ka Primary Health Center mynta ka sngi, ha ka jingiadonlang jong ki Sordar shnong bad ki nongshong shnong jong ka Lai Lyngdoh Area.
U la ong, “Phi dei ka thain kaba donbok namar la arphew snem tam ba phi la ia ksaid, hynrei mynta ka kynti ka la urlong bad ka dei barabor ka jingiatreilang jong ki nongialam shnong bad ki paid nongshong shnong ban pyntyllun ia ki kam pynroi pynpar ha ka dong bad ka thain”.
“Ngi dei ban peit barabor ia kaba bha ym ia kaba sniew bad ban iatreilang bad ki nongsynshar, la ka long ha shnong ne ha ka hima, khnang ban wanrah ia ka roi ka par kaba sted. Ka Sorkar ka la mang 9 klur 78 lak ban pynlut ha ka ban kyntiew kyrdan ia kane ka Sub Center sha ka PHC. Nga kular ruh ban phah pyndep noh hapoh ka shiphew bnai. Ai ba ka kam kan trei kham jam ban ia ka ktien”, u la ong.
Kiwei kiba la ai jingkren ki long ka Dr. S.A. Lyngdoh DMHO kaba la pyniaid ia ka jingialang, u Dr T Syiem ba la ai ia ka jingkren pdiang, u bah J Shangrit bad bah H.S Shangrit ki Sordar shnong Nongkynjang bad Nongkhlaw bad Dr. R Marwein ba la ai ia ka jingkren khublei pynwai.
