Shillong, Jymmang 16: U Lamphang ka ïingdorbar thawaiñ ka jylla u Thomas A. Sangma hynne ka sngi Saitjain ula leit iashimbynta ha ka jingplie pyrda ia ka 2nd Meghalaya Open Taekwondo Championship bad ia ka 1st State Level Taekwondo Championship (Kyorugi and Poomsae) ha Laban Sports Club.
Ia kane ka jingiakob ialehkai ka baar sngi, la pynlong da ka All-Meghalaya Taekwondo Association ha kaba da ki spah ngut ki nongialehkai na ka jylla Meghalaya, West Bengal, Assam, Sikkim, Nagaland bad Mizoram kila wan ban iashimbynta ha kane ka jingiakob.
Ha kane ka jingialang la wan ban iadonlang ka Sabitri Pradhan ka 7th Dan Black Belt bad ka Superintendent of Police, Sikkim Police Service, kaba long ruh ka Kyorugi International Referee, kaba la bat 7 sien ia ka World Champion bad ia ka South Asian Champion, u Grandmaster u Lee Wang Yong uba dei u 8th Dan Black Belt bad u Coach jong ka kynhun ialehkai Taekwondo ka ri India uba na ka ri South Korea, ka Suman Tamang ka General Secretary jongka Sikkim Amateur Taekwondo Association bad ka National Gold Medalist bad u Joseph Thansanga, u General Secretary jongka Mizoram Amateur Taekwondo Association.
Haba kren kum u kongsan, u Lamphang ula ong, ba wat ma u ruh ha ka por ba u dang khynnah udei u nongialehkai Taekwondo bad kiba don ha kane ka jingialang kila thapkti jam haba kila iohsngew ia kane.
“Taekwondo kam dei tang ka jingialehkai hynrei kadei ruh kum ka rukom im” ong u Sangma bad ka bynrap ba ka jingialehkai Taekwondo ka hikai ban long ba don akor bad uba ryntih, uba burom bad ula ong, ba u dap da ka jingkmen ban iohi ia ki nongialehkai kiba la wan ban iashimbynta naduh kiba dang rit haduh kiba la heh.
“Kin don tang katto katne ngut eh ki nongjop hynrei kin ym don pat ki nongrem. Phi jop ne phi ioh ia ka jinghikai” la ong u Sangma ia ki nongialehkai.
Nalor kane ula ong, ba ka jylla Meghalaya ka iengskhem ha kaban kyntiew ia ki kam ialehkai bad ban plie ka lad ka lynti ia ki samla ba kin kiew shaphrang hapoh ka jylla, ka ri bad ha ki kyrdan jong ka pyrthei bad ula kyntu ia ki nongialehkai ban bud ia ki nuksa ka jingjop jongka Sabitri Pradhan bad ka jingiashimbynta ha kane ka jingiakob ka lah dei lypa ka jingjop.
U Lamphang ula plie ruh ia ka jingialehkai kum ka dak jong ka jingsdang jong kane ka lympung iakob.
Kala don ruh ka jingpyninam Poomsae ia kaba la pyninam da ki nongialehkai jong ka All-Meghalaya Taekwondo Association.
Ha kane ka jingiakob, la sakhi ba kala shongshit haba ki heprit kila kiew ha ka rynsan ban iakhun para ma ki ha ryngkat ka riam paka kum ki nongiakhun bad kila ioh ia ka jingkyrshan kaba pura na ki nongpeitkai.
 ha Laban Sports Club.){kind=link}