Mairang, Lber 22: U Deputy Commissioner ka Eastern West Khasi Hills District Mairang, Bah W. Nongsiej hynne ka sngi Balang u la plie paidbah ïa ki ar tylli ki sem die dohkha, kiba la bei tyngka lyngba ka skhim jong ka sorkar pdeng kaba la ai kyrteng ka “Blue Revolution 2018-19”.
Ka jingïalang plie la pynlong da ka ophis jong ka Fishery Officer, Eastern West Khasi Hills District Mairang ha Iew Langstieh, ha ka jingïasakhilang jong u Syiem ka Hima Nongkhlaw u Pa’iem P.M Syiemlieh, ki Myntri jong ka Hima, ki nongïalam shnong, u Superintendent of Fisheries ka West Khasi Hills District, u Bah E.R Laloo, I Fishery Officer ka Eastern West Khasi Hills District, I Kong J.L. Nonglait, ki nongri dohkha ka thaiñ bad kiwei kiwei.
U Deputy Commissioner Bah W. Nongsiej haba ai jingkren, u la ong ba ïa kane ka projek, kaba la pyntreikam da ka tnat ri dohkha ka jylla lyngba ka skhim “Blue Revolution”, la pyndep ha ka jinglut kaba 10 lak tyngka kawei ka sem die dohkha, ha kaba 6 lak la ai kum ka subsidi, katba 4 lak pat la bei tyngka da ki nongïoh bhah na ka skhim.
U la ong shuh shuh ba lyngba kane ka projek, nalor ka jingtei ïa ki sem die dohkha, ki nongïohbhah ki ïoh ruh ïa ki mashin kiba kynthup ïa ki refrigerator bad ki tiar ba ju pyndonkam ha kaba ot dohkha kum ki wait, ki dieng shaiñ doh bad kiwei de.
U Bah Nongsiej u la ong ruh ba ka jingplie paidbah ïa kane ka projek ha kane ka sngi, kan plie lad ruh ïa kiwei pat ki nongri bad nongdie dohkha, ba kin kyntiew shuh shuh ïa ka kam ri bad die dohkha ka jong ki ha ki sngi ki ban wan, lyngba ka jingkyntiew ïa ka jingdon jong ki nongïoh bhah na kane ka skhim da ka tnat ri dohkha ka jylla.
Kiwei kiwei pat kiba la ai jingkren ha kane ka jingïalang ki kynthup ïa u Syiem ka Hima Nongkhlaw, u Pa’iem P.M Syiemlieh, u Syiem Khynnah jong ka Hima, u Pa’iem K.M Syiemlieh bad I Fishery Officer ka Eastern West Khasi Hills District, I Kong J.L. Nonglait.
