Tura, Lber 29: U Myntri Rangbah ka jylla u Conrad K. Sangma, ula plie ia ka Tnad kaba 25 jong ka HDFC Bank ha Tura, West Garo Hills, ha kaba la iadonlang ka MP barim ka jylla ka Agatha K. Sangma, u Abraham T Sangma u Superintendent of Police ka West Garo Hills, u CEO ka Tura Municipal Board u Rikse R Marak bad u Father Thomas John u Principal jongka St. Mary’s School.
Haba kren ha ka jingialang, u Conrad K. Sangma ula banjur ia ka jingkongsan ban pyniar ia ka jingdon ki Bank ha ki thain nongkyndong bad ha ki khapsor jong ka rilum Garo bad u don ia ka jingngeit kaba skhem ba kane ka tnad kaba thymmai kan noh synniang na ka bynta ban kyntiew ia ka ioh ka kot jong ka thain.
U Myntri Rangbah ula pynpaw ruh ia ka jingdonkam ban don ia ka lad ban ioh ia ka pisa bad ula kyntu ia ka Bank ba kan plie da ki lad kiban pynsuk ban ai ram ia ki nongseng kam lajong, kiba pyniaid ia ki karkhana rit, ki nongrep bad ia ki samla.
Ula banjur ba ka jingnang jingtip ha kaba iadei bad ka pisa pilain ka long kaba kongsan bha kaban pynkupbor ia ki nongshong shnong ba kin pyndonkam ia ki lad jingshakri kaba ki ioh lyngba ka Bank bad ula kyntu ia ki Bank ba kin iatreilang bad ka sorkar ban kyntiew ia ka jingai jingpynshai sha ki jaka kiba don ha kyndong tam bad ula pynthikna ba ka sorkar jylla kan ai ka jingkyrshan kaba pura ban pynbeit ia ki jingeh kaba mad da ki Bank ha ka jingtreikam hapoh ka jylla.
Katba ka Agatha K. Sangma, kala ai khublei ia ka HDFC Bank kaba la plie ia kane ka tnad treikam kaba thymmai bad kala pynpaw ia ka jingkyrmen ba kane kan kyntiew ia ka jingai jingshakri bad ban plie ia ka lad iohkam iohjam ha ka thain.
U CP Marak- IFS Retd, Executive Chairman ka MBOSE, ula pynpaw ia ka jingkongsan jong ki jaka ai pisa/ram ban pynthikna ba kan don ka jingshngain ha ka ioh ka kot bad ula kyntu ia ki paidbah ba kin pyndonkam ia ki lad bapher bapher lyngba ka jingdon jong ka Bank ha ki kam sei ne thep pisa ka jongki.
U Rikse R Marak, ula pdiang sngewbha ia ka jingpyniar jingshakri jong ka Bank kaba long ka sienjam kaban kyntiew ia ka jingnang jingtip ia ki paidbah khamtam ia ki longkmie bad ia ki samla ka rilum Garo ha kaba iadei bad ka pisa pilain.
U Father Thomas John ula buh jingduwai bad kyrkhu kyrdoh ba ka jingtreikam kane ka tnad bathymmai jong Bank kan long kaba seisoh ryngkat bad ka kyntu ia ki bor kiba pyniaid ba kin bat iala ka nongrim ha ka jingai jingshakri ia u paidbah.
Kane ka jingplie ia ka tnad bathymmai ka long kaba kongsan na ka bynta ban pynkhlain ia ka rukom treikam jong ki Bank bad ka jinglong jingman ha kaba iadei bad ka jingpyndonkam ia ka pisa pilain bad ban pynthikna ba ka jingai jingshakri ki Bank kan poi sha man la ki nongshong shnong.
