Shillong, Nailur 16 : U Myntri Rangbah ka sorkar jylla u Conrad K Sangma hynne ka sngi Baar ula plié ia ka State Guest House kaba la tei thymmai ha Taraghar, Shillong.
Haba kren ha ka jingialang kum u kongsan, u Conrad Sangma ula ong ba kane ka jingplie ka long u mawmer jong ka jingjop, kaba pyni ia ka jingieng skhem jong ka sorkar jylla ban pynkhlain ia ka jinglong kyrpang jong ka jylla Meghalaya bad ia ki jingtei jong ka.
Ula pynkynmaw ba naduh u snem 2018, ka Sorkar la shim ia ki sienjam kum ka jingpdiang bad jingmynjur ia ka State Emblem bad ka State Anthem, kumjuh ruh ban tei ia ki jingtei kum ki Guest House, kum ka nongrim ban wanrah ia ka jingsngewsarong bad ka jingtrei kaba paka ha ka jingai jingshakri jong ka sorkar.
Ula pynpaw ruh shaphang ka rekod jong ka jylla Meghalaya ha ka jingkiew ha ka ioh ka kot, ka jingbteng ka sorkar ban pynleit jingmut ha ka koit ka khiah bad ka pule puthi bad ki jingbei tyngka kiba dang iaid shakhmat ha kylleng sawdong jong ka Ward’s Lake.
U Symbud Myntri Rangbah ka jylla u Bah Prestone Tynsong, ula ong ba la jan 25 snem kam shym la don ka State Guest House bad ula pynpaw ia ka jingkongsan ha kaban shim ia ki rai kiba eh watla kala mad ia ki jingshah kynthoh.
Ula ong ba kane ka Guest House kaba thymmai ka long kum ka jingai sngewbha ia ki paidbah ka Meghalaya bad ula kyntu ba dei ban pyninam ia ka ha ka rynsan jong ka ri bad ban kynthup ruh ban pyni sha u Myntri Rangbahduh ka ri haba u wan jurip ia ka jylla.
Katba u Chief Secretary ka jylla u Bah D.P. Wahlang, ula banjur ia ka jingkongsan jong kane ka Guest House kaba thymmai ha kaban pynkhlain ia ka jinglah jong ka sorkar ban pdiang ia nongwankai sha ka jylla.
Ula pynpaw ba ha kane ka Guest House kin don ia 18 tylli ki Premium Room kynthup ia ka Executive bad VIP Suites, ym tang ba kan kyntiew shajrong ia ka dur jongka Meghalaya hynrei kan lam ruh sha ka jinglah ban kunai ia ka jingpynlut pynsep haba ianujor bad ki por kiba la dep ia kaba la pdiang ia ki nongwan kiba na shabar ha ki Hotel kiba la pyniaid da ki riewshimet.
U Commissioner & Secretary ka General Administration Department u Bah C.V.D. Diengdoh, ula pynpaw ba ia kane ka jingtei la sdang ha ka 14 tarik u Nailur 2022, ha kaba la tei bujli noh ha ka jaka kaba rim da ka jingtei kaba thymmai ha ka jinglut jingsep kaba kot T. 24.91 Klur.
Ula pynpaw ba ka jingpyniaid, ka jingkhmih bad ka jingsumar la pynkhamti ha ka Hotel Polo Towers lyngba ka jingkhot tender ban pynthikna ba kan don ka kyrdan kaba iaryngkat bad kiwei pat ki ri.
