Kyntu ia ki College ban pyniasoh noh sha ka State University ban lait na ka CUET
Shillong, K’lyngkot 13 : U Myntri Rangbah ka Jylla Conrad K Sangma ha ka sngi Nyngkong, ula plie paidbah ia ka State University ba nyngkong eh ka Jylla-ka Captain Williamson Sangma State University haba pynbna ba ka Sorkar kan sa pynkha sa ia ka Campus ha Shillong.
Ia ki jingtei jong kane ka University la plie ha u Kyllalyngkot 2023. Ha u Jylliew 2018, ka mynjur ban tei ia kane ka skulbah ha ka jingmang tyngka ba kot T.16.96 klur. Ia kane ka skulbah la ai kyrteng ia u Myntri Rangbah ba nyngkong eh ka Jylla u Captain Williamson Sangma.
Ha u 2011, ka jingthaw ia kane ka University ka dei kaba la pynwandur nyngkong kum ka Captain Williamson Sangma State Technical University ban pyniasoh ia ki Technical College hapoh ka Jylla. Hynrei ha u 2022, ka Sorkar Jylla kala pynkylla kyrteng ia kane ka University kum ka Captain Williamson Sangma State University, ban pynthikna ba baroh ki technical bad non-technical college kin ioh ban pyniasoh.
Haba khein ia kane ka jingplie ia ka Univeristy kum ka sngi sah jingkynmaw, u Myntri Rangbah ula ong “Kane ka University kan ym shakri tang ia ka Higher Education hynrei kan kyntiew ruh ia ki kam wadbniah (research) bad ka jingwanrad ia ki buit treikam ba thymmai (innovation, ka ban wanrah ia ka jingkylla ha ka kam pule dangle hapoh ka Jylla”.
Ula ong ba ka jingpyntreikam ia kane ka University ka dei ka jingkular jong ka Sorkar ia ki paidbah ka Jylla. “Ha kine ki palat 50 snem, ka Jylla kam shym la don iala ka jong ka University. Ka jingthaw ia ka University ba pyniaid hi da ka Jylla ka dei ka jingpynshisha ia ka jingshimkhia jong ka Sorkar ban kyntiew ia ka jingkiew shaphrang bad ka roi ka par ha ka pule ka dangle” ong u Myntri Rangbah.
“Ka University kan ym dei tang ka kyrteng; ka dei ka jingkular. Ka jingkylli jong ka jingkyrmen, ka jingkiew shaphrang, ki lad ki lynti ki bym lah niew na ka bynta ki paidbah ka Meghalaya” ula bynrap.
U Myntri Rangbah ula pynbna ruh ba ka Sorkar kan sa pynkha sa ia ka Shillong Campus jong ka University, ka ban iarap ha ka ban pynsuk ia ka jingtreikam bad kumjuh ruh ia ki samla pule ka Ri-lum Khasi bad Jaintia.
“Kane ka University kan sdang treikam noh naduh mynta bad baroh ki Collehe hapoh ka Jylla ki lah ban jied ha kaban aplai ban pyniasoh bad la ka jong ka University” ula pyntip haba pynpaw ba ka jingpyniasoh bad la ka jong ka University kan pynthikna ba ki samla pule kin ym donkam shuh ban hap leit iakhun ia ka Common University Entrance Test (CUET) ha kaban leit pule under-graduate bad post-graduate course ha ki collehe ba iasoh bad ka Captain Williamdon Sangma State University.
Ula pyntip ba ka CUET kan treikam tang ia ki college kiba iasoh bad ka North Eastern Hill University (NEHU), Shillong.
“Nga kyntu ia ki College ba kin shim ia kane ka kabu bad pyniasoh noh sha ka Captain Williamson Sangma State University” ula ong haba bynrap ba ka Sorkar Jylla kan ai jingiarap ia ki jaka pule ba pyniasoh ha kat ki jinglah jong ka ban pynthikna ba kin kiew shaphrang.
Kiwei kiba la kren ha kane ka sngi ki kynthup ia u Deputy Speaker Timothy D Shira, MLAs Sanjay A Sangma, Ian Botham K Sangma, Subir Marak, Sengchim Marak, Jim Sangma, Limison Sangma, Marthon Sangma, Vice Chancellor University, Prof. Vasanthi Vijayakumar, CEM ka GHADC Albinus Marak, Deputy CEM Nikman Marak, bad kiwei kiwei.
Ka University Grants Commission (UGC) kala ithuh ia ka Captain Williamson Sangma State University kat kum ka kyndon 2(f) jong ka UGC act 1956 lyngba ka shithi bala phah ha ka 6 tarik Nohprah 2024.
