Tura, Naitung 30 : U Myntri Rangbah ka Jylla Conrad K Sangma ha ka sngi Balang, ula plie paidbah ia ka bottling plant kaba heh duh hapoh ka thain Shatei Lam Mihngi ha Mendipathar, North Garo Hills.
Kane ka bottling plant jong ka Varun Beveragers Limited (PepsiCo) ka dei kaba la shna ha ka jaka bah eh 37 acre ha Mendipathar Industrial Area bad ka jingkynshew pisa ba kot T.340 klur.
“Kane ka project ka dei ka jingkyrkhu ia ka Jylla jong ngi, namar ka plie ia ka lad iohkam iohjam bad ai jingmyntoi ia ki briew jong ka thain ha kiba bun ki liang” ong u Myntri Rangbah bad bynrap “Kane ka dei ka dak ka jingkiew ka ioh ka kot ba ka Meghalaya kala don ha ka lynti kaba dei ban kynjoh ia ka thong. Ym ju don ba poi pyrkhat bad ka bottling plant kaba heh duh kan wan ha Mendipathar”.
U Myntri Rangbah ula iathuh ruh ba ka project ba heh kat kane ha Ri-lum Garo, kan nang kyntiew ia ka jingangnud jong ki samla. “Ki samla kin sa iohi ia ki kabu ba kane ka plant kan plielad ia ki. Ngi lah ban antad ba ki lad bapher bapher kin sa wan hapoh ka thain”.
U Myntri Rangbah ula pynpaw ba ka Mendipathar Industrial Area ka dei kaba la wanrah naduh ki snem 1990 hynrei la palat 30 snem, ym shym la don satia kiba kynshew kam. “Ha kine ki 30 snem bala leit, ym don satia ki karkhana kiban wan. Kila don ki jingkyrmen bad jingkhmih lynti, ki bym shym la urlong satia” ula ong haba pynpaw ia ka jingsngewkhia jong u (L) PA Sangma, uba iohi ia ka Mendipathar kum ka engine ka roi ka par jong ka Ri-lum Garo.
“Mynta ka sngi ka dei ka sngi jong ka jingkyrmen bad ka jingpynurlong ia ka jingiohi jngai ba u (PA Sangma) don na ka bynta ka Mendipathar bad ka Jylla baroh kawei” bynrap u Myntri Rangbah.
Ula ai jingithuh ia ka jingsynniang jong ki Nokma bad ki paidbah ka Mendipathar ha kaban ai ia ka jaka ban seng ia ka Industrial area ha ki 30 snem bala leit noh.
Kane ka bottling plant an aikam kumba 500 ngut ki nongtrei ki ban pynmih bad sam ia ki mar PepsiCo, kynthup ki umsoh bapher bapher.
U Myntri Rangbah ula kyntu ia ki paidbah ba kin shim kabu ia ki kam ba iadei bad ka ioh ka kot bad pynbna ruh ba sa kawei ka plant kan sa mih ha ka thain Tikrikilla Bajengdoba, ha kaba 90% ki kam kila dep mynta.
Ha kane ka sngi la iadonlang u Symbud Myntri Rangbah Timothy D Shira, u Myntri kam bording AT Mondal, u Myntri ka PHE Marcuise Marak, Chairman ka MIDC James K Sangma bad kiwei kiwei ki MLA.
U Myntri Rangbah ula ai khublei ruh ia u Chairman ka Varun Beverages Limited, Ravikant Jaipuria bad u Varun Jaipuria, halor ka jingseng ia ka bottling plant kaba hehduh ha ka thain Shatei Lam Mihngi ka Ri.
