Shillong, Nohprah 22 : U Myntri Rangbah ka Jylla hynne ka sngi palei, ula plie paidbah ia ka Ophis treikamba thymmai ka Shillong Press Club.
Kane ka jingplie Ophis ka long ruh shibynta na ka jingrakhe ia ka jingdap 30 snem jong ka Shillong Press Club bad ka National Press Day.
Haba kren ha ka jingialang, u Conrad ula ong “Nga shim ia kane ka kabu ban ai khublei bad kitbok kitriang ia phi baroh namar nga thikna ba kane ka dei ka sngi ba kyrpang ia phi baroh naba kane ka dei kaei kaei kaba ka SPC bad ki Dkhot kila apkhmih lynti la slem bha”.
“Ka jingdon ia ka Ophis ba shirta jong ka SPC kan wanrah ia ka jingskhem ha ka jingtreikam kaba phin trei nangne shakhmat” ula ong.
U Myntri Rangbah ula banjur ruh halor ka jingdonkam ban ai jinghikai ia ki nongthoh khubor ba kin pynanai ialade kat kum ka jingiaid jong ka por.
“Phi wan ialam ia ki nongthoh khubor na shabar, phi ialam ia la ki jong ki Nongthoh khubor shabar, ai ba kin iohi, ai ba kin sngew ba kin sngewthuh bad iohi ia kaei kaba jia shabar bad kiwei kiwei ki jaka. Ai ba kin briew kin wan bad iohi ia kaei kaba jia hangne. Lehse ki lah ban don bon ki briew ki ban ioh jinghikai na ki nongthoh khubor hangne. Ta ka daw nga sngew ba ka long kaba donkam ban don ia ki jingai jinghikai” ula ong.
Ia kane ka Ophis ba thymmai jong ka Shillong Press Club la plie ha ka jingiadon ryngkat ki Heh Ophis ba kynthup ia u Prabin Bakshi, Commissioneer & Secretary, Bah Israel Ingti Secretary, bad M Sangma Director ka Information & Public Relation, Meghalaya ha ryngkat ki Dkhot bala rangbah jong ka Press Council of India.
Kane ka Ophis ka don ia ka Conference Hall bala pyndait ia ki kor pynsawa bad ki LED Projection System, ka jaka shong ba syndak ka Ophis u President bad ka jaka treikam jong ki Nongthoh khubor bala pyndait ia ki kor internet bad kiwei kiwei.
Ban pyniphuh iphieng ia kane ka Ophis, ka Executive Committee jong ka Shillong Press Club kala iatreilang ruh bad ki Nongdro dur jong a Riti Academy ban ai ia ki dur kiba iahap ban wah ha ka conference hall, kiba kit jingmut bad ka jingrakhe ia ka jingdap 50 snem ka Jylla Meghalaya.
Ha shiliang jong ka kynroh la wan ia ka dur jong ki Myntri Sorkar ba nyngkong eh ka Jylla Meghalaya ha u snem 1972 ba kynthup ia u Capt Williamson A Sangma Myntri Rangbah bad kiwei kiwei ki Myntri Sorkar kata u Bah B B Lyngdoh, Edwinson Bareh bad SDD Nichols Roy.
Kawei pat ka bynta la wah ia ka dur jong ki dei ki riew pawkhmat ha ka Sorkar kiba la trei na ka bynta ka jingkiew shaphrang jong ka Jylla kum u Prof Radhon Sing Lyngdoh, Martin N Majaw, P Ripple Kyndiah, bad Peter G Marbaniang.
Kawei pat ka kynroh ka don ia ki dur jong ki briew ba pawkhmat kum u BahHoover Hynniewta, Darwin D Pugh, Stanling D Khongwir, bad Sanford K Marak.
Hadien habud, ka Shillong Press Club ka don jingthmu ruh ban kynthup lang ia kiwei pat ki nongialam jong ka Hill State Movement, ki ban saw ah ha ki kynroh jong kane ka Ophis ba thymmai ka Shillong Press Club.
