Shillong, Naiwieng 07 : U Myntri Rangbah ka Jylla Conrad K Sangma hynne ka sngi Ba-ar, ula plie paidbah ia ka North East Summit ban iakhun pynduh jait ia ka jingpang TB, ha ka jingialang kaba long ha Courtyard Marriot.
Haba kren ha ka jingialang, u Myntri Rangbah ula ong ba ka kam sumar sukher ka dei ka kam ba hakhmat eh jong ka Sorkar. “Ha kine ki khyndiat snem bala leit, ngi lah bunkam bad kynshew bha ha ka kam jong ka koit ka khiah bad shim ruh ia ki buit treikam bapher bapher ban pynthikna ia ka jinglong janai ha ka kam sumer sukher ha Meghalaya” ula ong.
U Myntri Rangbah ula pyntip ruh ia ka jingpynkiew bunshah ia ka bhah mang tyngka jong ka Sorkar Jylla sha ka koit ka khiah bad bynrap “Kaba bun na kane ka song pisa kala leit sha ki Health Mission bad ruh sha ki Health & Wellness Centre kiba la iarap shikatdei eh ban pynjanai bad pynioh ia ki lad sumar sukher kiba janai ha ki jaka sumar ka Sorkar”.
Haba kren ba kumno ka jingtreikam jong ki Kynthei ha ki Self Help Group bapher bapher kala nang aibor ia ki ha ka ioh ka kot, kaba nang pynbha pat ia ka koit ka khiah, u Myntri Rangbah ula ong “Ka jigniadei hapdeng ka koit ka khiah bad ka ioh ka kot ka dei kaba lah ban thew lyngba ka jingpyniapher halor ki kam ka koit ka khiah kum ka jingiap ki briew, ka jingiap ki khunlung ba dang kha, ki jingpang kiba kwah ia ka jinglah treikam ki briew” ula ong.
U Myntri Rangbah ula ong ruh ba ka ioh ka kot jong ki briew ka dei u mawbyrsiew ba kongsan eh jong ka jingroiha ka ioh ka kot. Ula kren ruh halor ka jingdon jingiadei hapdeng ka koit ka khiah bad ka jingkiew ka ioh ka kot.
U Myntri Rangbah ula pyntip ruh ba ka don bun ki khep halor ka jingslem ban sumar ia ka jingpang TB khamtam hapdeng ki longiing kiba duk ki bym shym la leit sha ki doktor tad haduh da kila shitom jur.
“Ka jingiashimbynta lang ki Shnong ki thaw, ka jingpynioh ia ka bam ba tei met, ban wanrah ia ki buit ai jingsumar, ka jing pynshai halor ka jingpang, ka jingleh screening dang shen bad ka jinglehkhuid bad kiwei kiwei, ki dei katto katne ki sienjam kiba lah ban pynsted ia ka thong ban lah pynlong ia ka India kaba lait naka jingpang TB hapoh u 2025” ula bynrap.
U Myntri Rangbah ula kyntu ia ki kynhun bapher bapher kiba don ha ka Tnad ka koit ka khiah ba kin nang iai bteng ban treikam da ka jingthmu, ka jingkut jingmut bad ka jingtrei shitom. “Ngim dei ban kylla long ka Sorkar ba shu ai skhim bad prokram hynrei kaba lah ban leh eiei na ka bynta ki paidbah” ula ong.
Kiwei pat kiba la ai jingkren ki kynthup ia ka Myntri ka Koit ka Khiah Kong Ampareen Lyngdoh, u Dr Roderico H Ofrin uba dei u WR, WHO, India.
Ha kane ka sngi u Myntri Rangbah ka Jylla ula pyllait paidbah ruh ia ka kor Meghalaya Mobile Portable AI based X-Ray diagnostic.
