Tura, Rymphang 11: U Myntri Rangbah ka Jylla Conrad K. Sangma mynta ka sngi u la plie ia ka Nokrek Skate Park ha Tura Government College hapoh ka Sports Infrastructure Development Initiatives, da ka jingthmu ban pynbun ia ki madan ialehkai bad ka jingiashim bynta jong ki samla ha West Garo Hills.
Ia kane ka skate park la shna kum ka Corporate Social Responsibility (CSR) jong ka Decathlon bad la pyntreikam da ka OneStage ryngkat ka jingiatreilang bad ka Global Himalayan Expedition (GHE). Kane ka madan ka dei kaba thmu ban kyntiew ia kiwei pat ki jait jingialehkai bad ban pynbiang ia ka jaka pynlut por ki samla ha ka thain.
Haba kren ha ka jingialang u Myntri Rangbah u la ai khublei ia ka jingtrei shitom jong ka Tura Government College, ki nongiadon bynta lang, bad ki seng kiba kwah ban pyndep hok ia kane ka projek.
Haba pynkynmaw ba u la buh ïa u mawnongrim ia katei ka projek la jan shi snem mynshwa, u la ong, “Ka don ka jingsngewhun ban ïohi ïa ka jingpyndep ïa kawei ka projek kaba la buh ïa u mawnongrim. Ka pynkmen ïa nga ban don lang ha baroh ar tylli ki khep.”
U Myntri Rangbah ula ong ba bun ki samla ba ïalehkai skateboard ki ïalehkai ha ki jaka paidbah namar ka jingbym don ki madan ïalehkai ba kyrpang bad u la pynpaw ïa ka jingkyrmen ba kane ka jaka thymmai kan pynbiang ïa kane ka jingdonkam.
Ka Nokrek Skate Park la khmih lynti ba kan long kum ka jaka ba kyrpang na ka bynta ki riew ieid ialehkai Skateboard ha Tura bad ki jaka ba marjan.
