Shillong, K’lyngkot 19 : U Myntri Rangbah ka Jylla Conrad K Sangma ha ka sngi Nyngkong, ula plie paidbah ia ka motdur tynrai u Khasi ha kynroh (Khasi Traditional murals) jong ka Seng Samla Mawlai Pyllun (SSMP)-kum ka dak ka jingrakhe ia ka jingdap 20 snem ka seng.
Ia kane ka motdur ha kynroh la pynieng ha Rymbai Fuel Station, kaba dn ha Mawlai Mawiong Rim.
Haba kren ha ka jingialang, u Myntri Rangbah ula ai khublei ia ka Seng Samla Mawlai Pyllun halor ka jingkynjoh ia u mawmer ba 20 snem ha ka jingshakri bad noh synniang sha ka shnong Mawlai.
U Conrad ula ong ba ki don katto katne ki nongrim treikam kiba ialam lynti ia ka jingtreikam jong ka Sorkar bad ka nongrim treikam ba kongsan eh ka long ban pynthikna ia ka jingkhmih bad jingshimkhia ia ki jingeh jong baroh ki briew ha ka imlang sahlang.
“Ki samla jong ka imlang sahlang ki dei ki kynhun ba kongsan eh bad ki kynhun ha ki shnong ki thaw kum ki seng samla ki long kongsan bha ym tang ia ka lawei hynrei ia kane ka por ba mynta ruh jong ka Jylla” ula ong.
Namar kata, u Myntri Rangbah ula kyntu ia ki samla ba kin shim kabu ia ki prokram bad ki skhim jong ka Sorar Jylla kiba la mang kyrpang na ka bynta ki samla ka Jylla khnang ba kin roi ki par bad ba kin kiew shaphrang ha ka jingim namar ka Sorkar kala tyrwa ia ki lad ban ai jinghikai halor ki sap treikam bapher bapher, ki rynsan bad ki kabu kiba bun.
“Ka khubor kaba nga kwah ban ai mynta ka sngi kam dei satia tang ia ki samla ka shnong Mawlai hynrei ia ka Jylla baroh kawei, ka long ba ka pyrthei mynta ka dei ka pyrthei ba hap ban iakhun (competitive) ia kiei kiei baroh bad katba ngi dang don ia ki kyndon jong ka Riti Synshar ba iada ia ka hok jong ngi, to ngin ym long kiba khein sting noh iakiei kiei baroh hynrei ban pynkhreh ialade ha ka ban iakhun bad kiba tbit tam ha ka pyrthei” ula ong.
“Nga kyrmen ba kane ka jingrakhe jong ka Seng Samla Mawlai Pyllun kan ai mynsiem ia ki samla jong ngi ba kin long kata ka jingkylla” ula bynrap.
Haba pynkut ïa ka jingkren, u Myntri Rangbah u la ong ba ka jingshna dur tynrai kaba pyni ïa ka kolshor jong ki Khasi kan long ruh kum ka jingkhring dur bad ka jingpdiang sngewbha ïa ki nongwan jngohkai pyrthei kiba wan rung sha Shillong.
Ha kane ka sngi la aiti ruh ha u Myntri Rangbah ka Jylla ïa ki dorkhas na ki Dorbar Shnong bad ki seng Seng Samla jong ka thaiñ, kiba la pynpaw ïa ki katto katne ki jingeh bad ki jingdonkam jong ka thaiñ Mawlai.
 jong ka Seng Samla Mawlai Pyllun (SSMP)-kum ka dak ka jingrakhe ia ka jingdap 20 snem ka seng){kind=link}