Shillong, Naiwieng 27: Watla kala shim por haduh 25 snem ban pyndep ia ka phase-I jong ka Meghalaya Biological Park, hynrei kala bat pat ia ka jingkular ban long ka bynta kaba kongsan ha ka jingshimkhia ka jylla ban pynneh pynsah ia ki jingdon jingem jong ki jingim bapher bapher kaban long ruh ka lad ia ki pateng ban dang wan ban ioh ia ka lad ban shemphang haka pule ka puthi jongki.
Haba pynpaw ia ka jingkmen halor kane ka jingangnud kaba la slem, u Myntri Rangbah ka jylla u Conrad K Sangma hynne ka sngi Balang ula pynpaw iaka jingsngewhun da kaba ong, “Nga dap da ka jingkmen kaba khraw ban plie ia ka wat kaba nyngkong jongka Meghalaya Biological Park, ka projek kaba la shim por jan ar phew snem shiteng ban pyndep”.
“Haba ngi plie ia ka mynta ka sngi, ki dang bun ki kam kiba dang hap ban leh ban pynlong ia kane ka jaka kaba bit ba biang bad kaba treikam pura” ula ong bad ka banjur ba kane kam dei tang ka jaka kaban pynbyrngia bad ka jaka sngewtynnad hynrei kan long ka rynsan kaba kongsan na ka bynta ki samla ban tei iaka jingmut jong ka jingdon ia ka jingkitkhlieh ha kaba iadei bad kamariang bad ki mrad khlaw.
Kane ka jingïalang ka pyni ia ka jingpyndep ïa ka projek kaba la don ha ka jingpynkhreh mynta la palat 24 snem, ha kaba la jop ïa ki jingeh kiba bun ha ka jingiaid lynti. Ha kane ka jingplie paidbah Meghalaya Biological Park ha Umtrew la wan ban sakhi da u Myntri ka tnad Animal Husbandry and Veterinary u bah A.L. Hek, u MLA ka Umsning u Dr Celestine Lyngdoh, u Chief Advisor u Bah Lakhmen Rymbui bad u Chief Secretary u Bah D.P. Wahlang.
Wat kala don ka jingshim por bun snem bha ban pyndep ia kane ka projek, kaba la shah khanglad namar ki jingmad ia ki jingpynslem ki bapher bapher, u Myntri Rangbah ka jylla ula pynpaw ba ka sorkar kala bat ia ka jingkular ban pyndep ïa ka projek bad kane ka ieng kum ka jingpynshisha ïa ka jingpynleit jingmut ha ka jingpyniaid shakhmat ia ka kam kaba ïahap bad ka mariang.
“Katba bun ki bynta, kum ki jaka die tiket, ki jaka bam, ki dukan die ia ki tiar ban sah jingkynmaw bad ki jingtei ia ki jingker, ki dang don hapdeng ka jingtei, kala long kaba kongsan ban sdang ïa kane ka wat, ban pynïasoh ïa ki imlang sahlang bad ban ïaid shakhmat,” ula bynrap.
Shisien bala dep tei pyndep ia ka Park, ka thmu ban shakri kum ka jaka ban ri ia ki mrad kiba la ioh ban pyllait im, ban ai ka jaka kaba biang ba kin lah ban im kum kata ka jaka shong jaka sah ka jongki.
U Myntri Rangbah ula kdew ruh ïa ka jingdonkam jong kum kine ki sienjam kaban ïahap ïa ki kam jong u briew bad ka jingiada ïa ki mrad ki mreng. “Kine ki projek ki ailad ïa ngi ban ai jaka ïa ki mrad kiba donkam ia ka jingïarap bad ha ka juh ka por ban hikai ïa ki paidbah, khamtam eh ïa ki khynnah, ban don ïa ka jingsngewrit bad ka jingkitkhlieh ïa ka sawdong sawkun jong ka mei mariang” ula ong.
Ula kren ruh shaphang ka jingthmu ka sorkar, kaba kynthup ban pynim biang ia ki projek kiba rim kiba la sahkut namar kiba bun ki daw bad ula banjur ia ka jingdonkam ban lum ia ki jingtip, ban jurip bad ban wad bniah ban ioh ia ka jingkhein kaba thikna ia ki jingthung jingtep bad jingim bapher ha ka jylla. Katei ka jingtip, kan iarap ban ithuh bad pynduna ia ki jingiatyngkhuh hapdeng ki briew bad ki mrad khlaw, haba bunsien kala jur ka jingleit kyntur pud u briew sha ki jaka jong kiba shong bas ah ki mrad.
“Ngi dei ban tip bad nang ban burom ia u pud u sam jong uwei ia uwei pat. Kiba bun ki jingiatyngkhuh ki mih, haba ki briew ki kyntur pud sha ki jaka mariang hynrei da ka jingdon ia ka jingsngewthuh bad burom ïa u pud u sam ngin lah ban ïa imlang” la ong u Conrad Sangma bad ka batai shaphang ka jingpyrshang jong ka sorkar ban pynshlur ïa ki shong ki thaw ban pynkylla ïa ka Biological Park sha ka jaka jngohkai pyrthei kaban ai jingmyntoi lang ïa kiba ieid iaka mariang bad ïa ki nongshong shnong katei ka thaiñ.
Ha kane ka jingïalang la donlang ki riew pawkhmat ha ka jingiada bad pynneh pynsah ia ki mrad ki mreng, kiba kynthup ïa u S.M. Sahai, Principal Chief Conservator of Forests (Wildlife & Biodiversity) & Chief Wildlife Warden; R.S. Gill, Principal Chief Conservator of Forests & HOFF, Sampath Kumar, Principal Secretary, Forests & Environment Department bad u P.K. Agrahari, Chief Executive Officer, Meghalaya Zoo Project Implementation Society.
