Shillong, Lber 28: U Myntri Rangbah ka Jylla u Conrad K Sangma ha ka sngi Saitjain, u la leit plie ia ka jingrakhe dap 150 snem jong ka Dorbar Shnong Lawjynriew, ka ba la pynlong ha Lawjynriew Football, Nongthymmai.
Ha kane ka sngi la don lang ruh u Myntri ka tnat pule puthi u Bah Lakhmen Rymbui, u MLA ka Nongthymmai, u Bah Charles Pyngrope bad u Chief Executive Member ka KHADC u Bah Winston Tony Lyngdoh.
Haba ai jingkren, u Conrad ula pynpaw ïa ka jingkmen ban ïashim bynta ha kane ka sngi kaba sah khana ha ka jingrakhe ïa ka jingdap 150 snem jong ka Shnong Lawjynriew bad ai khublei kyrpang iaki nong shong shnong daka ba bynrap “Ka jingpdiang burom ha ka rukom leh tynrai ki Khasi, ki jingpyni ia ka kolshor kaba ngi sakhi mynta ka pyni ia ka jingriewspah ha ka pateng bad ka jingiatylli jong kane ka shnong.Ka long ka jingpynkynmaw kaba sngew sarong ia ka jaitbynriew” ula ong.
U la ong ba ka khana shaphang ka Lawjynriew kam dei tang ka khana shaphang kawei ka shnong hynrei ka dei ka khana kaba ïasnoh bha bad ka jingroi ka nongbah Shillong bad ka histori jong ka jylla. “Naduh ki sngi ba nyngkong jong ka hapoh ka jingsynshar tynrai jong ka Hima Mylliem haduh ka jingpynrung kyrteng tynrai jong ka ha ka snem 1876, kane ka shnong ka la ieng ha ka jingtynjuh jong ka por,” u la ong haba ai khublei ïa ki nong shong shnong ka Lawjynriew kiba la pynneh pynsah ïa la ka jong ka jinglong katba ki dang pdiang ruh ïa ki jingkylla khamtam eh ki samla pule na kylleng ka thaiñ shatei lammihngi,” u la bynrap.
U Myntri Rangbah u la ong ba ka pateng jong ka shnong ka nang riewspah shuh shuh da ka jingdon jong ka ia ki jaka pule kiba kongsan bad ka jingnoh synñiang sha ka pule puthi bad ka roi ka par ha ka imlang sahlang kaba ieng kum ka dak jong ka jingïatylli, ka jingïalong kawei, bad ka jingkiew shaphrang.
Nalor kane, u Myntri Rangbah u la pan ïa ka jingïatreilang jong ka shnong ha ki projek pynroi bad ki prokram bapher bapher.
Haba pynskhem ïa ka jingkular jong ka Sorkar ban kyrshan ïaka imlang sahlang, u CM ula pynbna ban ai ïa ka song pisa kaba T.30 lak na ka Chief Minister’s Special Development Fund sha ki jingdonkam jong ka shnong.
U Myntri Rangbah ka Jylla ula plie paidbah ruh ïa ki katto katne ki projek jong ka Dorbar Shnong Lawjynriew kynthup ïa ki CCTV, 8 tylli ki Location Signage bad ula pynlait paidbah ruh ïa ka website bad ka Dashboard jong ka Shnong.
