Shillong, Feb 8: U Myntri Rangbah ka jylla u Conrad K Sangma, hynne ka sngi Palei, ula plie ia ka Jackfruit Processing Unit ha Gulpani Nokat, Rongara, South Garo Hills bad pyntip ba ka Sorkar ka don jingthmu ban plie ia ki processing unit jong ki soh bapher bapher hapoh ka Jylla.
Ia kane la plie ha ka jingiadonlang u Myntri ka pule puthi u Rakkam A Sangma uba long ruh u MLA ka Rongara-Siju, bad u MLA ka Baghmara u Kartush R Marak, u MLA ka Amlarem uba long ruh u Chief Advisor jong ka sorkar u Bah Lakhmen Rymbui bad u CEM ka GHADC u Albinush Marak.
Inaugurated the Jackfruit Processing Unit cum Rongara PRIME HUB in Gulpani Nokat, Rongara Block, South Garo Hills District.
South Garo Hills has one of the finest quality jackfruits in the State. Recognizing the immense potential of the jackfruit industry, the project was… pic.twitter.com/OGxgAdaE45
— Conrad K Sangma (@SangmaConrad) February 8, 2024
Haba kren ha ka jingialang u Conrad K Sangma, ula pynpaw ia ka jingkmen ban plie iaka Jackfruit Processing Unit ha ka thain bad ong ba kane kan ym kut tang ia u sohphan hynrei ka sorkar ka don ia ka jingthmu ruh ban plie ia ki processing unit na ka bynta kiwei kiwei ruh ki jait soh, ki jhur ki jhep bad kiwei kiwei ha kylleng ka Jylla.
Ula pyntip ba ka Meghalaya ka don kyrhai ia ki soh bad ki jhur hynrei ki paidbah kim shym la ioh pat ban kheit ia u soh jong ka jingiohnong na kitei kijait soh bad jhur kiba la shu kylla long lehnohei noh.
“Ngi la sdang iakiba bun ki prokram da kaba iaid da ka mishon khnang ba ki nongrep kin lah ban kamai arshah ha ka ioh ka kot ka jongki bad bun ki mishon kum ka Lakadong Mission, Ginger Mission, Jackfruit Mission kila kyntiew iaka ioh ka kot jong ki paidbah ha ki thain nongkyndong” ula ong.
Ula ong ba la tei ia ka Jackfruit Processing Unit ha ka jinglut kaba kot T.2 Klur bad la pyniaid ia ka lyngba ka bording solar kaba kot 100 KW bad kane kala plie lad ban ioh ia ka bording kaba khuid bad ban pynneh iaka mariang.
“Kane ka Processing Unit kadei kawei na ki Processing Unit kaba bha tam hapoh ka jylla bad kadei kaba la paw ha ka Architecture Review ba kadei ka Top 15 Sustainable Design ha ka pyrthei bad kane ka Unit kan kylla long ruh kum ka community hall ne ka jaka sah na ka bynta ki nongshong shnong lada jia ba wan lynshop ka bor mariang.
Ula pyntip ba kumba T.1.5 lakh haduh T.2 lakh u Sohphang yn thied na ki paidbah man la ka sngi ha kaba yn sa saindur bad song bha ia ki hadien bala shna ia ki kum ki jackfruit chips, jackfruit flour, jackfruit jam bad kiwei kiwei bad kumba 150 ngut ki kynthei kin ioh jinghikai bad iohkam bad lyngba kane ka project yn pynmih haduh kumba 20 jait ki jingbam na u Sohphan ka Meghalaya.
“Nga dap da ka jingkmen ban pyntip sha phi ba ngi la ioh lypa iaka order ne ki nongthied na ri Russia bad naka dewbah Europe ba ki kwah ban thied iaki jait jingbam kiba pynmih na u Sohphan bad kane ka long ka jingkmen bad ka jingsngewsarong ia ngi baroh” ula ong.
U Myntri Rangbah ula iathuh ba kane ka unit kaba la pyniaid da ka Rongara Agro Food Processing Cooperative Society kadei kaba la longtrai da ka shnong ka thaw.
“Ngi don ia ka thong ba kane ka Processing Unit kan wanrah ia ka jingkylla naka bynta ki 5000 ngut ki nongrep bad ban aikam aijam ia ki samla ha kylleng ka rilum Garo” ong uMyntri Rangbah.
Ula pyntip ruh ba ki don 440 tylli ki Integrated Village Cooperative Societies bad 28 tylli ki Organic Farmer Producer Organisations bad T.78.5 Klur ka jingshongdor jongki jingtei kiba latei ha kylleng ka jylla ha kaba iadei bad ka kam rep kam riang bad ka sorkar ka iengskhem ban kyntiew iaka jingiohnong ki nongrep ha kajylla.
“Palat 160 tylli ki micro-processing centers kiba kynthup ia ki Processing Units jong u Syieng, Kwai, ki shynrai, sohphan, sohmarit, kait bad kiwei kiwei la dep ban tei” ula ong.
U Myntri Rangbah ula pynpaw ruh ia ki kattokatne ki kam pynroi na ka bynta ka South Garo Hills bad kaba kham kongsan kadei ka Ranikor-Rongara-Baghmara Road kaba lah jan dep shna lut, ka jingtei iaka projek kam pynroi ha Baghmara bad ka jingsdang ia ka Science bad Commerce Stream ha Captain Williamson Sangma College, Baghmara kaban ai jingmyntoi ia ki samla pule jong ka South Garo Hills.
Katba u Rakkam A Sangma, ula ong lyngba ka jingdon jong ka Processing Unit ba ym tang ka dor jongu sohphan kan kiew hynrei wat ia ka dor jong kiwei kiwei ki jait soh ruh kin kiew lang bad kane kan kyntiew ia ka ioh ka kot jong ki paidbah ka thai.
Ula banjur ruh, ba ka don ka jingjur jong ka jingsangeh leit skul ki khynnah ha ka district bad ula kyntu ia ki kmie ki kpa bad ia ki khynnah ba kidei ban shimkhia bha ia kapule puthi bad ula banjur ruh ha kaba iadei bad ki lad ki lynti jong ka South Garo Hills ban kyntiew ha kaba iaei bad ka kam jngohkai bad ka donka mia kiba bun ki kam pynroi na ka bynta ban kyntiew ia ka kam jngohkai.
