Shillong, Lber 27: U Myntri Rangbah ka Jylla Conrad K. Sangma ha ka sngi Thohdieng, ula plie pyrda ia ka Indian Sailing League (ISL), kaba la pynlong ha ka sien kaba nyngkongeh ha Umiam Water Sports Complex (Orchid Lake Resort), Umiam.
Kane ka jingiakob ka sdang naduh ka 27 bad kan kut ha ka 31 tarik mynta u bnai bad la pynlong da ka Department of Tourism ka Sorkar Meghalaya ryngkat ka jingiatreilang bad ka Umiam Sailing Club bad ka United De Novo Association of Yachting.
Ha kane ka lympung yn lumlang ia ki 14 tylli ki kynhun bad 182 ngut ki nongiashimbynta kynthup ia ki 58 ngut ki nongking lieng kiba na ki 8 tylli ki ri, kaba pyni ia ka jingheh jong kane ka lympung iakob. Ha kane ka sngi la iadonlang u Myntri ka kam jngohkai ka jylla u Timothy D. Shira, ki heh sorkar bad ki nongmihkhmat jong ki Sailing Association.
Haba kren ha ka jingialang, u Myntri Rangbah u Conrad K. Sangma ula pynpaw ba ka Indian Sailing League kadei shi bynta jong ka jingiohi jngai lypa ban plie ia ka kabu halor ka jinglah ka Umiam bad ban buh ia ka Meghalaya ha ka kyrdan kum ka jaka kaba lamkhmat ha ka kam jngohkai bad ha ka jingpynlong ia ki jingiakob kiba heh ha ka pyrthei. Haba pynkynmaw ia ka jingwan jngoh mynshwa ia kane ka jaka, ula pynpaw ba kane ka jinglah kadei kaei kaei kaba ym shim la pyndonkam satia la slem bah bad ka banjur ba ka sorkar kala trei shitom ban wanrah ia ki jingkylla lyngba ka jingpynwandur bha ia ka roi ka par.
“Kane ka sienjam kadei kaba la buh bha ha ki jingmut pyrkhat, ngi lah sngewthuh ba kane ka jinglah bad ka jingbiang kane ka jaka kadei kaba ym shim la pyndonkam satia. Kumta ngi lah shim ia ka rai ban kyntiew ia ka, ha kata ka rukom ban plie ia ki lad ban lah ban pyndonkam pura” ula ong.
Ula iaroh ia ka jingnoh synniang jongu Lt. Col. Alok Yadav bad ka kynhun ka jongu ryngkat bad u Bah Cyril V.D. Diengdoh bad ki kynhun kiba ai jingkyrshan ban pynurlong shisha ia kane ka lympung iakob. Ula banjur ia ka rukom shimkhia kaba iar jong ka sorkar bad ula ong ba ka jingiakob kum ka ISL kadei shi bynta jong ka buit treikam kaba iar. “Ka thong ka jong ngi ka long kaba shai kdar, ban thaw ia ka jinglong jingman kaba ki paitbah kin ong, “Ngi kwah ban leit jngoh ia ka Shillong. Ngi kwah ban leit jngoh ia ka Meghalaya.’
Haba pynpaw halor ka jingiaid shakhmat jong ki jingtei, ula ong, ba ka jylla kam shim la don ia ka 5 Star Hotel ha u snem 2018, hynrei mynta artylli kila treikam bad sa katto katne ki dang don ha ka lynti. Ula pyntip ruh ba yn sa tei ia ka Taj Spa Resort ha Umiam bad kane kan dang kyntiew shuh shuh ia ki jingtei ha ka liang jong ka kam jngohkai.
Ha kaba iadei bad ki lad pyniasoh, ula kdew ba ka Shillong Airport mynta ka lah treikam, ba ka jingpynheh bad jingpyniar ia kane ka kad liengsuin kala iaid shakhmat ban lah ban pdiang ia ki liengsuin kiba heh hapoh jong u snem 2027, khnang ba yn lah ban pyniasoh beit beit bad ki nongbah kiba heh ha ka ri.
U Myntri Rangbah ula batai ba ka Meghalaya kala nang paw kum ka jaka kaba pynlong ia ki jingiakob ki bapher bad ka kdew ia ka jingpynlong ia ki International Concert, Film Festival bad ki jingiakob ialehkai. “Man la kine ki sienjam ki thaw ia ka bynta ban lam sha kaba heh, ban pyniasoh ia ka jingiaid jongka jylla ban nang roi ha ki 5, 15 bad wat ha ki 50 snem kiban dang wan” ula ong.
Ula kren ruh halor ka jingpynkhreh ban pynlong ia ka National Games ha u 2027 bad ki jingkynshew tyngka kila iaid shakhmat ha ki jingtei ia ki jaka ialehkai kynthup ia ka Slalom Course ha Umtham bad ula pynpaw ba ka jylla ka don ruh ia ka jinbgthrang ban pynlong ia ki jingiakob kiba don jingiadei bad ka 2036 Olympics, khamtam ha ka Sailing bad Water Sports.
Hashwa kane, u Lt. Col. Alok Yadav, Commissioner League, ula pynpaw ba kane ka League kadei ka sienjam kaba don ia ka thong ban pynlong ia ka Sailang kaba shongshit bad kaba lah ban iashimbynta da kiba bun.
Ula pynpaw ia ka jingsngewkmen ban iohi ia ka jingwan iashimbynta kiba bun ha kane ka lympung bad ula pyntip ba kane ka jingiakob ka dang don ha ka lynti ban aplai ia ka rekod, kaba kynthup ia ka jingdon bun tylli tam ki lieng bad ka jingwan iashimbynta kaba bun ngut tam na kylleng ki ri bad ula kyntu ban iashimbynta da ka jingkhuid jingsuba ha kane ka jingiakob bad ban iengskhem ha ka mynsiem kum ki nongialehkai.
, kaba la pynlong ha ka sien kaba nyngkongeh ha Umiam Water Sports Complex (Orchid Lake Resort), Umiam.){kind=link}