Shillong, Nailar 12 : U Myntri Rangbah ka Jylla Conrad K Sangma, ha ka sngi Ba-ar, ula plie paidbah ia ka Iingskul ba dang tei thymmai jong ka Manai Higher Secondary School ha Mairang, bad pyntip ba ka Sorkar Jylla ka la pynlut T.1100 klur shisnem ban iarap kum ka grant sha ki skul ba ai jingiarap (aided) ka Sorkar.
Kane ka jingplie ia kane ka Iingskul ka dei ruh ka dak ka jingkyntiew kyrdan ia ka skul sha ka Higher Secondary School, ka ba plie lad ia ki khynnah skul ba kin pynbteng ia ka jingpule ha ki kyrdan Higher Secondary hala ka jong ka thain.
Haba ai jingkren ha ka jingialang, u Myntri Rangbah ula kren halor ka jingkiew jong ka skul naduh ka sien wan iuhkjat ba nyngkong eh jong u la jan arphew snem ha ka por ba ka iingskul ka dang dei tang ka iingdieng. Ula ai ka jingiaroh ia ka jingaiti lut jong ki Managing Committee kiba rim bad kiba mynta, ki nonghikai bad ki nongshongshnong ha kaban ialeh ia ki jingeh ha kaban wanrah ia ka pule ka dangle kaba bha sha ki samla ka thain.
Ula kren ruh halor ka jingtheh pisa jong ka Sorkar Jylla sha ka kam pule dangle bad iathuh ba ka Jylla ia mynta kala pynlut ia palat T.1,100 klur manla u snem kum ka grant sha ki skul ba ioh jingiarap na ka Sorkar ne ki aided school.
Haba kubur ia ki jingeh ha ka liang ka pisa pilain, u Conrad ula ban jur ia ki jingpyrshang ban ai ia ki jingiarap sha ki skul haba kdew ia u soh ba ioh kheit kum ka Manai Higher Secondary School. Ula pynshlur ruh ia ki skul ba kin shim kabu ia ki skhim ka Sorkar bad ki song pynroi ba kyrpang ban kyntiew ia ki jingtei, ki digital learning bad kiwei ki jinghikai nalor ka jinghikai ia ki kot pule kynthup ka put ka tem bad ki kam ialehkai.
Ha kajuh ka por, u MLA bad Chairman ka Meghalaya State Planning Board Bah Metbah Lyngdoh ula kren halor ka jingiohi jngai bad ki jingpyrshang jong ki nongialam ka thain 44 snem mynshuwa ban seng ia ka skulk a ban ai jingmyntoi ia ki khynnah skul na Manai bad ki shnong ba marjan.
Ula pynpaw ia ka jingdonkam ban nang pynroi shuh shuh bad iaroh ia ka jingiashimbynta jong ka shnong ka thaw bad ka jingiatreilang jong ka Sorkar ban jam shakhmat sha ka thong jong ka kam pule dangle.
Kiba la iadonlang ha kane ka sngi ki kynthup ia u Myntri ka Tnad C&RD Abu Taher Mondal, ka Myntri ka Koit ka Khiah Kong Ampareen Lyngdoh bad kiwei kiwei ki kynrem ki lyndan.
 ka Sorkar.){kind=link}