Shillong, Nohprah 19:U Myntri Rangbah ka jylla u Conrad K Sangma bad ka Myntri ka tnad ka koit ka khiah ka Kong Ampareen Lyngdoh hynne ka sngi Baar, kila plie paidbah ia ka ICU project ba 10 jingthiah ha ki 14 tylli ki jaka ai jingsumar kiba don ha kylleng jong ka jylla kiba hap ha ki 11 tylli ki District.
Ka ICU Project ba 10 jingthiah kadei ka jingiatreilang hapdeng ka tnad Health and Family Welfare, jong ka sorkar jylla bad ka eGovernment Foundation bad kane ka sienjam ka kynthup ia ki 10 tylli ki jingthiah ha ki ICU ha ki hospital kiba don ha ki district jong ka jylla.
Haba kren ha ka jingialang u Myntri Rangbah ula iaroh ia baroh ki nongdon bynta kiba la shimkhia ban pyntyllun ia kane ka projek ban pynthikna ban ai iaka jingsumar bad ka jingai jingshakri ha ki thain nongkyndong bad ha ki jaka kiba jynjar ha ka jylla kynthup ia ki Hospital ha ki District.
“Ki tiar ki tar bad ka rukom treikam la pyniaid ha kata ka dur ban ban ailad ia ngi ban pyndonkam ia ki jingdon jingem bad ban pynlong ia ki kiba treikam pura. Ka long ka jingai mynsiem ban pyniar ia kane ka jingshakri, khnang ba ka jingkyrshan kaba bha tam ha kaba iadei bad ka koit ka khiah na ka bynta ki katto katne ki jaka kiba jngai bad kiba jynjar ha jylla, yn lah ban pynurlong” ong u Myntri Rangbah.
Ula ong ba ka sorkar jylla kala buh hakhmat eh ia ka koit ka khiah bad da kaba buh ia kane hakhmat ka sorkar jylla ka la mang 8% ia ka Mang tyngka ha kaba iadei bad ka koit ka khiah, kaba long ruh kaba heh tam hapoh ka ri.
Katba ka Myntri ka Koit ka Khiah ka Kong Ampareen Lyngdoh kala ong lyngba kane ka projek ka sorkar jylla kan lah ban pynbiang ia jingsumar ha ki ICU ha ki District ki bapher bapher bad ka jingplie paidbah ia ka 10 Bed ICU project kan iaid shakhmat ban pynthikna ba kan don ka jingkylla ha kaban kyntiew ia ka jingai jingsumar ha ka jylla.
Ha kane ka jingialang la iadonloang u Chief Secretary ka jylla u Bah DP Wahlang, u Principal Secretary ka tnad ka koit ka khiah u Sampath Kumar, u Chairman ka Infosys u Nandan Nilekani, u Chairman ka 10 Bed ICU u Srikanth Nadhumuni, u nongseng ka Karuna Trust u Dr Sudarshan Hanumappa bad u Public Health Expert bad Scientist u Nichiket Mor.
Ka 10BedICU Project la pynwandur hadien ba kala don ka jingsaphriang jong ka COVID-19, da ka jingthmu ban pynbiang ia ki jaka ai jingsumar kiba kyrpang ha kylleng ki bynta jong ka jylla kynthup ia ki jaka kiba jngai kiba don ha kyndong kynshrot.
