Shillong, Nohprah 16: U Myntri Rangbah ka jylla u Conrad K Sangma hynne ka sngi thohdieng, ula plie paidbah iaka Football Stadium jong ka P.A. Sangma Sports Complex, kaba ki paidbah kila angnud la slem bha.
Ka jingshna thymmai ia katei ka stadium kadei ka kam kaba radbah, kaba la shim da ka sorkar jylla bad kane ka football stadium kadei kaba kynsai tam ha ka ri da ka jingpyndonkam iaki kor teknoloji naduh ka por ba pynwandur iaka bad ha kane ka stadium lah ban ngiam haduh 9500 ngut.
Kane ka stadium kaba itynnad ka dei shi bynta jongka Sports Complex kaba la tei haka jinglut jing sep kaba kot T.127.7 Klur ia kaba la jan dep tei lut baroh.
Ia ka Football Stadium bad 2 tylli ki Indoor Stadium la tei ha ka jaka kaba don 17,000 Sqms bad ha ki Indoor Stadium kan don ka Gymnasium, Swimming Pool, Table Tennis Hall, Squash Hall bad Badminton Hall bad kine ki jingtei kiba dang iaid shakhmat, yn sa plie paidbah hapoh jongu Nohprah 2023.
Ka tnad Sports and Youth Affairs jongka jylla ka don iaka jingthrang ban kyntiew ia ki kam ialehkai hapoh ka jylla bad ban pynshlur ia ki khynnah ba kin ialehkai ia ki jingialehkai ki bapher bad kala thaw ruh iaka Sports Policy ha u 2019.
Kala shimkhia ruh ban tei ia ki jingtei kiba kyrpang kiba iaryngkat kyrdan bad kiwei pat ki ri khnang ba ki khynnah bad ki samla kin ioh ban ialehkai ia kaba ym pat ju don haka jylla Meghalaya kiban shimkhia naduh ki por kiba mynshwa.
Kila don 318 tylli ki jingtei kiba la shna ha kylleng ka jylla bad ha ki bnai ban wan kan don ruh ka jingkyntiew kyrdan iaka JN Stadium, Polo Ground Shillong, ka Wahiajer Stadium bad Indoor Stadium ha Jongksha.
Ka sorkar jylla kala sdang ruh iaka Talent Identification Program na ka bynta ki nongialehkai (Athletes) bad ka jingthmu jong kane ka prokram ka long ban lap iaki nongialehkai kiba dang khynnah bad ban ai jinghikai kyrpang ia ki.
Ha ka wat kaba nyngkong kin don 4,600 ngut ki khynnah kata naduh 10-18 snem ka rta ha kaban ynialeh ban lap iaka sap ka jongki kum ki nongmareh da kaba pynshong nongrim haka International Standard.
Ha ka jingwad bniah ia kine ki khynnah la lap bun ngut ki don shisha iaka sap kaba kyrpang ha ka rukom mareh ka jongki kaba hap bad kaba kham palat ban ia ka International Standard.
U Raksan Sangma, uba dang 17 snem ka rta uba na South West Garo Hills ula shim por tang 2.84 sekhon ha ka jingmareh kaba 20 meter katba ha ka ri baroh kawei ka jingmareh 20 metre ka long 2.99 sekhon.
Ka sorkar kala ai jingiarap ruh ia ki nongialehkai ka jylla kiba la wan rah nam bad burom iaka jylla bad ka jinglut jingsep kala kot sha ka T.3.14 Klur kaba la ai jingmyntoi iaki 3000 ngut ki nongialehkai.
Ka jylla kala lah ruh ban pynlong ia ka 2nd North East Olympic Games kaba la long kaba jop khamtam haba ki nongialehkai na ki jylla bapher bapher kila pynpaw ba ki tiar ki tar bad ki jaka ielhkai kila long kiba ia ryngkat dor ha ka International Level bad wat ki Technical Staff bad ki Coach kila iaroh ia ki nongpyniaid ia kateika lympung ialehkai bad ka jylla Meghalaya kala thaw ruh iaka rekod ha ka jingioh khur bun ki takma ha katei ka lympung.
This is a tribute to one of Garo Hills’ tallest leaders (L) P A Sangma. While this is a great accomplishment for the Govt., this is a personal milestone for each of us & we paid our respects to the vision of this great leader of our State. pic.twitter.com/pAP493v1hg
— Conrad Sangma (@SangmaConrad) December 16, 2022
Ha ka jingplie iaka Football Stadium, kala don shwa ka jingleh burom bad ka jingplie ia u mot sahnam jong u (L) P.A Sangma bad kala don ruh ka jingialehkai Football Paralok hapdeng ka kynhun jong ka jylla Meghalaya pyrshah iaka North East United Football Club.
Nalor kane, la pynlong ruh iaka prokram pyni iaka riti dustur tynrai bad ka jingpynbyrngia ia ki paidbah da ki kynhun tem jong ka jylla bad la pynkut ia kane da ka jingthang ia ki bom pataka ne Fireworks Display kaba la pynsngewtynnad ia baroh.
U Myntri ka Koit ka Khiah ka jylla u James PK Sangma ula don lang ha ka jingplie ia katei ka football stadium.
