Williamnagar, Nailar 10: U Myntri Rangbah ka Jylla Conrad Kongkal Sangma hynne ka sngi ula plie paidbah ia ka farm ri sniang ba dang shu dep tei thymmai ha ka shnong Rikwareng, Samanda, East Garo Hills bad pyllait paidbah ruh ia ka skhim ri sniang sha kyrpong iing na ka bynta ki shnong nongkyndong (Rural Backyard Piggery Scheme).
A subset of the Rural Backyard Livestock Distribution scheme funded by the National Livestock Mission & the State Govt at ₹16.92 Cr for Phase 1, State Govt will allocate an additional fund of ₹25 Cr to extend the program to another 10000 poorest households of the State@PRupala pic.twitter.com/e70gbTDzLh
— Conrad Sangma (@SangmaConrad) August 10, 2022
Haba kren ha ka jingialang, u Myntri Rangbah ka Jylla ula ong ba lyngba ki prokram bala pyntrei ha ka dur jong ki Mission (mission mode) bapher bapher, ka Sorkar kala lah ban iarap ia ki nongri jingri na ki jaka nongkyndong.
U pyntip ba ka Sorkar ha kine ki saw snem bala leit noh,kala wanrah ia shibun ki skhim ban pynthikna ba ki nongshongshnong ha Nongkyndong kin lah ban trei ia ki kam ki ban ai kamai bad kyntiew ia ka ioh ka kot.
“Haduh 4.5 lak ngut ki paid Nongrep ha ka Jylla kila donkam palat ia ki skhim/programme ban kyntiew ia ka jingim jong ki bad ngi lah lah ban wanrah ia ki skhim bapher bapher “ ula ong haba pyntip ba lyngba ka Rural Backyard Piggery Scheme, haduh 6000 ngut ki briew kin sa ioh ia ki khun sniang ban ri.
Ka wat ba nyngkong jong kane ka project ka dei kaba mang ban pynkut haduh T. 16.92 klur naka bynta ki 6000 ngut ki nongioh skhim bad yn sam ruh haduh 24000 tylli ki khun sniang ha baroh kawei ka Jylla.
U Myntri Rangbah ula pyntip ba ka Sorkar ka lah ban mang tam ia ka pisa sa T. 25 klur na ka bynta ka Rural Backyard Piggery Scheme, ka prokram kaba la bei tyngka lang da ka Jylla bad ka National Livestock Mission, ka Sorkar India.
U Myntri u pyntip ba nalor ka Rural Backyard Piggery Mission, ka Sorkar Jylla ka dang pyntrei ruh mynta ia ka skhim ri sniang kaba heh duh kaba ka jingmang pisa ka kot haduh T. 109 klur hapoh ka Jylla.
Haba pyntip ba lyngba kane ka skhim ri sniang, ka Sorkar ka kwah ban shim ia ka kabu halor ka jingduna ka jingshalan dohsniang ha Jylla, u Myntri Rangbah ula ong “Ka Sorkar Jylla ka hap ban wanrah sniang ba shongdor haduh T. 600 klur manla u snem tang ban pyndap ia ka jingbam doh hapoh ka Jylla”.
U la pynpaw ia ka jingkyrmen ba lyngba kine ki skhim, ka Jylla kan sa lah ban pyndap hi noh nalade ia ka jingdonkam doh sniang hapoh ka Jylla bad ka ban ai jingmyntoi ruh ia ki nongri sniang.
Ha kane ka sngi, u Myntri Rangbah lem bad u MLA ka Willimanagar Marcuise Marak, MLA ka Rongjeng Jin Sangma bad kiwei kiwei ki kynrem ki lyndan, kila sam ia ki khun sniang bad ki cheque sha ki kynhun nongrep napoh ka FOCUS.
