Shillong, Aug 9: U Myntri Rangbah ka jylla Conrad K Sangma ha ka sngi Thohdieng, u la plie paidbah ia ka kompeni iMerit kaba pyndonkam ia ka kor AI ha Shillong IT Park, Umsawli ha ka jingiadon lang ka Radha Basu kaba dei ka nongseng bad ka CEO jong ka iMerit.
Haba jied ia ka Shillong kum ka jaka kaba bha tam ban seng ia ki kompeni kiba pyndonkam ia ka IT, u Myntri Rangbah ka Jylla u la ong, “Ka sorkar ka la sdang ia ki jingiarap ban thaw ia ka rukom treikam na ka bynta ki jingshakri kiba pyndonkam ia ka IT ban roi. Ka sorkar ka dang pyntreikam ïa ki projek ban pynthikna ïa ka jingpynïasoh internet kaba sted bad kaba lah ban shaniah ha baroh kawei ka jylla”.
Haba kren shaphang ka jingsynshar ba la pynïaid da ki jingkhein jingdiah ne ki data, kaban sa shim ïa ka bynta kaba kham heh, u la ong, “Ki jingkhein jingdiah ki la long kawei na ki jingdonkam ba kongsan ba ka sorkar ka la pyndonkam ban shim ïa ki rai ba kongsan ki ban pynmyntoi bha da ki jingdon jingem kiba duna”.
Haba pyntip ba ka Sorkar kala pyndonkam ia ka teknoloji ban pynbeit ryntih ia ki sienjam bapher bapher kum ka jingpeit bniah ia ka koit ka khiah jong ki kmie bad ki khynnah, ban shna map ia ki jingthung jingtep bapher bapher, ka jingdon ki khlaw bad ki mrad mreng ha Jylla. “Ka bynta jong ka teknoloji ka dang wad na ka bynta ki lad ki lynti kiba stad bad ngi kum ka sorkar ngi pynshlur ïa ki kompeni ban bei tyngka bad wad ïa ki lad ki lynti kiba ka jylla ka lah ban ai”.
Ka iMerit ka dei ka AI Solutions IT Company kaba don haduh 5000+ ngut ki nongtrei ha kylleng ki ri America, Europe, Bhutan bad India, ha kaba 200+ ngut ki nongtrei ha Meghalaya kiba kynthup ia 64% ki nongtrei ki dei ki kynthei.
