Shillong, Nailar 09 : U Myntri Rangbah ka Jylla Conrad K Sangma ha ka sngi Palei u la plie ïa ka jingtei ba dang shna thymmai jong u District Medical & Health Officer, Nongpoh ha Ri-Bhoi District ha ryngkat ka jingïadon lang ka Myntri ka koit ka khiah ka Dr. Ampareen Lyngdoh bad u MLA ka thain.
Haba kren ha ka jingialang plie, u Myntri Rangbah ka Jylla u la pynpaw ba ka Sorkar ka la pyrshang shitom ban pynbha ïa ki jaka sumari ha kaba ïadei bad ki jingtei, ka jingpynbiang ia ki tiar sumar bad ki briew.
“Ka la don ka jingpynjanai kaba la bun bha hynrei ka dang don shibun kiei kiei kiba dang dei ban leh khamtam ha ki Shnong ki thaw,” u la ong.
Haba pyntip ba ka Sorkar kala buh kyrpang ïa ka mang tyngka ban pynjanai ia ka rukom treikam ka tnat ka koit ka khiah baroh kawei, kynthup ïa ka jingthaw ïa ka board thung kam ba kyrpang, u la ong, “Ka board thungkam ba kyrpang ka la ïarap ïa ka tnad ban pynjanai ha ka jingthungkam ha ka kyrdan jong ki Doktor bad ki Nurse”.
Ia kane ka jingtei ba thymmai la shna ha ka jinglut kaba T.18.4 klur bad yn pyndonkam ia ka na ka bynta ka Ophis treikam bad ka jingbuh ia ka Trauma Centre.
U Myntri Rangbah ula pyntip ruh ba ka Sorkar Jylla kala dep ruh ban mang pisa na ka bynta ban shna pynbha noh ia ki PHC bad ki CHC ha kylleng ki jaka jong ka Jylla.
U la ïathuh ba haduh 148 tylli ki jaka sumar ki dang don hapdeng ka jingmaramot ba kynthup ia ka jingkyntiew kyrdan ia ki Civil Hospital ha ki District bapher bapher.
Ki lai tylli ki district hospital kiba dang pynkiew kyrdan mynta ki long ka Tura, ka Shillong bad ka Jowai Civil Hospital.
