Tura Lber 04: U Myntri Rangbah ka jylla u Conrad K Sangma, hynne ka sngi Nyngkong ula plie ia ka Academic Block bad ia ka jong ka Captain Williamson Sangma Government College ha ka jingialang kaba la long ha ka phyllaw jong katei ka skulbah.
Kiba la iadonlang ki kynthup ia u Myntri ka pule puthi u Rakkam A Sangma, u MLA KA Baghmara u Kartush R Marak, u MLA ka Amlarem & u Chief Advisor jong ka Sorkar Jylla u Bah Lakhmen Rymbui bad u Chief Secretary ka jylla Bah DP Wahlang.
Haba kren ha ka jingialang u Myntri Rangbah ula ai burom ia la u Kpa u (L) P.A Sangma ha ka lyngkhuh sngi iap kaba 8, “Kadei ka jingiohi jngai bad ka jingngeit jong u (L) PA Sangma ula shim ban kyntiew shaphrang ia ka pule puthi ha ka jylla bad ula buh ia u maw nongrim ia kane ka College ha u 2008 bad kumta ka long kaba iahap bha ba ha kum kane ka sngi ba ia katei ka projek la sdang ha u 2008 kala iaid ha ka lynti kaba dei bad ngi la lah ban plie ia ki jingtei naka bynta ki jingpule ha ki kyrdan kiba heh na ka bynta ki samla bad ki paidbah jong ka South Garo Hills.”
Ula pynpaw ia ka jingsngewnguh ia u Myntri barim ka pule puthi jong ka sorkar kaba la dep bad ia ka kynhun kiba la sdang ia ka jingpynkylla ha ka pule puthi bad ula ong ba ka thong bad ka jingiohi jngai kaba la buh da ka tnad pule puthi ha ki 5 snem kiba la dep la shim bad pyniaid shaphrang haduh kine ki sngi kiba mynta.
“Nga ngeit skhem ba ha ka liang ka pule puthi yn iohi iaka jingkylla kaba radbah ha kine ki sngi ban wan hapoh ka jingialam jong u Myntri uba mynta” ula ong.
Ula ong ruh ba ki samla ki long ki atiar kiba kordor bha hynrei ka long kaba donkam ban ai ia ka rynsan kaba dei, ki kabu bad ki jingbtin lynti khnang ba kin lah ban pyndonkam iala ka bor ka sor, ka sap ka phong jongki. Ula ong, ba ka pule puthi kadei ka mat kaba hakhmat eh kaba ka sorkar ka buh hakhmat bad kumta ka sorkar ha u 2020 kala kytiew ia ka jingbhah tyngka ha ka pule puthi na ka T.27 Klur sha ka T.350 Klur bad ka sorkar kala bhah T.3000 Klur na ka bynta ki jingpynlut ha kaba iadei bad ki samla.
U Myntri Rangbah ula iathuh, ba ula leit jurip ia ka Baghmara College ha u snem 2019 bad lap ba ka jingshna ia ki jingtei kam long satia kaba shngain na ka bynta ki samla pule khamtam haba kala dei kaba la rim bha bad sdang tor.
“Nga dap da ka jingkmen ba hapoh 5 snem, ngi la lah ban pynbiang ia ki jingtei kiba thymmai ia ki samla bad ki paidbah jongka Baghmara,” ula ong bad ka bynrpa ba ka Kynhun Myntri shen kan sa mynjur ia ka jingtyrwa ban buh ia ka Science bad Commerce Stream ha Sohra, Williamnagar bad Baghmara College.
U Myntri Rangbah ula kyntu ia ki nonghikai bad ki samla pule ba kin shimlang ia ka jingkitkhlieh ban pynlong ia kane ka College kum kata ka ‘Centre of Excellence’.
Katba u Rakkam A Sangma, ula ong ba kadei ka sngi kaban sah jingkynmaw na ka bynta ka Baghmara bad South Garo Hills baroh kawei bad ula pynkynmaw shaphang ka jingiaid lynti haka jingseng ia ka college bad ia ka jingshna ia ki jingtei ki bapher haduh mynta.
La sdang ia ka Captain Williamson Memorial Government College ha u snem 1994 bad la Pyniaid da ka sorkar jylla ha u snem 2008 bad ha ki snem kiba hadien ka sorkar kala rai ban kyntiew noh ia ka Captain Williamson Memorial Government College ha ka jinglut jingsep kaba kot T.10.80 Klur, ka jingthmu ka long ban iaid ryngkat bad ka jingbthah jong ka NEP 2020 ban pynbiang ia ka jingpule ha ki lain bapher bad ban kyntiew ia ka GER ha ka Higher Education ha ki District da kaba thaw ia ki Academic Block kiba thymmai.
Ka jingbuh dor haka Tender naka bynta ki jingshna ia ki jingtei la mang T. 8,51,65,956.00 bad la pyntrei bad khmih bniah lyngba ka State Higher Education Council (SHEC) bad lyngba katei ka jingbhah tyngka ka sorkar jylla kala thaw ia ka Academic Building kiba kynthup iaka kamra pule, library, laboratory & jaka leit shabar ryngkat bad ki jaka shnong bad ki tiar ki tar kiba thymmai.
Ki samla pule kiba pule ha ka Arts ki don 1180 ngut bad da ka jingthmu ban sdang ia ka Science bad Commerce Stream la khmih lynti ba ka jingwan pule ki samla kan kiew bha bad ka College kala sdang ia ki kam ki jam ban sdang ia ka jingpule Honours Course ha ka B.Sc. bad B.Com bad la phah ruh ia ka jingtyrwa sha ka sorkar jylla.
Ia ka jingtei ia ka Girls’ & Boys’ Hostel ha Captain Williamson Memorial Government College la bei tyngka da ka NEC ha ka jinglut jingsep kaba kot T. 1.20 Klur.
