Shillong, Risaw 28: U Myntri Rangbah ka jylla u Conrad K. Sangma, hynne ka sngi baar ula plie ia ka Block Integrated Development Complex (BIDC) kaba la tei thymmai ha Pynursla C&RD Block, East Khasi Hills District, ha ka jingdonlang u Symbud Myntri Rangbah ka jylla u Bah Prestone Tynsong.
Haba kren ha ka jingialang, u Myntri Rangbah ula ai ka jingiaroh ia ki ophisar bad ia ki nongtrei jong ka Pynursla C&RD Block bad ia ka shnong ka thaw halor ka jingaiti ka jongki ban pynurlong ia kane ka project.
U Myntri Rangbah ula ong, ka jingkyntiew bad ka jingshna pynbha ia ophis treikam kadei ka mat kaba kila buh hakhmat eh naduh ba la thaw ia ka sorkar MDA ha u snem 2018. Ula ong ba watla ki scheme kin ym kylla, ka thong ka long ban pynthikna ba ki scheme kiba la don lypa kidei ban poi sha ki paidbah ha ka lynti kaba ryntih bad kaba paka khnang ba ka jingtreikam kan long kaba biang bha.
Ula ong ba kiba bun hi na ki 46 tylli ki Block Offices kiba don ha kylleng ka Meghalaya kila duna ha ka jingdon ia ki jingdonkam kiba biang, ha kaba bun kila treikam na ki jaka kiba shipor ne ha ki jingtei kiba la jot la sniew.
“Phin kyndit ban tip ba ki don katto katne ki Block Office kila treikam tang ha ki artylli ki kamra ha ryngkat bad 4 ne 5 tylli ki tnad treikam da kaba pyndonkam ia kajuh hi ka kamra. Kumta ngi lah rai ba man la ki Block kidei ban don ia ka ophis treikam kaba biang, kaba long ruh kaei kaei ia kaba ym pat ju leh mynta la 30 ne 40 snem” ula ong.
U Myntri Rangbah ula pynbna ba baroh 56 tylli ki Block ha ka jylla la bhah ia ka tyngka ban don ia ka jaka treikam kaba pura bad ka rukom tei ia kine ki ophis kan long beit da kajuh hi ka Design ne ka jingpynwandur. Ula pyntip ba na kitei ki 56 tylli ki Block don kiba la dep plie, kiba dang don hapoh ka jingtei ne haka lynti ban khot tender noh bad kumta hapoh jong ka shi snem ne ar snem, man la ki Block kin don noh ia ka ophis kaba thymmai.
Ula iathuh ruh ba palat T.150 Klur la pynlut ha kaban pynbha ia ki ophis treikam jong ka sorkar bad la bhah tyngka shuh shuh hapoh jong ka Police Infrastructure Renovation Fund (PIRF) ban ailad ia ki Superintendents of Police (SP) jong ki District ban kin phah maramot ne kyntiew ia ki Police Station.
U Myntri Rangbah ula pyntip ruh ba jan kumba T.500 Klur la pynlut ha kaban pynbha bad maramot ia ki skul ha kylleng ka jylla Meghalaya, naduh ki skul ha ka lower primary, upper primary, secondary bad higher secondary.
“Ngi pynthikna ba ym dei tang ia ki ophis sorkar kiba ai jingshakri ia u paidbah hynrei wat ia ki skul sorkar ruh ba kin don noh ia ki jingdonkam kiba kongsan. Mynta ngi dang iaid shakhmat ban pynbha ia ki skul kiba ai jingiarap da ka sorkar bad ia ki skul SSA” ula ong.
U Myntri Rangbah ula iathuh ruh ba la bhah tyngka ruh na ka bynta ban kyntiew ia ki jaka sumar kiba kynthup ia ki PHC, Sub-Center, ka ophis treikam bathymmai jong ki DC bad SDO ha ki jaka kiba dang duna ia ki jingdon jingem da ki phew snem.
“Ngi long kiba shai kdar ba lada ngi don ia ka jingthrang ban ai ka jingshakri kaba bha ia ki paidbah ha ki shnong ki thaw, kadei ban wan lyngba ki jingtei kiba biang ban shakri ia ki. Dei da katei ka jingbuh jingmut bad ka jingiohi jngai ba kane ka Block mynta ka sngi kala lah ban urlong” ula ong.
Kiwei kiwei kiba la donlang ha kane ka jingialang ki kynthup ia u Myntri Sorkar uba khmih ia ka Arts & Culture u Bah Sanbor Shullai, u Chief Secretary ka jylla u Dr P Shakeel Ahmed, u Bah CVD Diengdoh, Commissioner & Secretary ka sorkar jylla, ka Kong Evarinylla Warjri, SDO (Civil), Pynursla Civil Sub-Division, u Bah Peter T. Passah, MCS, Project Director, DRDA, East Khasi Hills, bad kiwei kiwei.
 kaba la tei thymmai ha Pynursla C&RD Block, East Khasi Hills District, ha ka jingdonlang u Symbud Myntri Rangbah ka jylla u Bah Prestone Tynsong.){kind=link}