Shillong, Risaw 19: U Chief Justice ka Meghalaya High Court u Justice Sanjib Banerjee, ula plie paidbah hynne ka sngi Palei, ia ka building jong ka Iingkashari District Session ka West Jaintia Hills, ha Khliehtyrshi.
La plie ia kane ka Iingkashari ka District ha ka jingiadonlang u Symbud Myntri Rangbah ka jylla bah Sniawbhalang Dhar, Justice H. S Thangkhiew, Justice W.Diengdoh, Justice B. Bhattacharjee, Additional Judge, High Court of Meghalaya, u MLA ka thain u Bah Wailadmiki Shylla bad kiwei kiwei.
Haba ai jingkren, u Chief Justice ula pynpaw iaka jingdonkam ban don ki District Session Court, ki ban shim ia ka bynta kaba khraw bha ha kaban pynioh ia ka jingbishar kaba hok sha ki paidbah.
U Chief Justice ula pynpaw ruh halor ka jingdonkam ban don ka jingbishar kaba sted, ka bym noh shilliang bad ka bishar ban iada iaka hok ki paidbah nong shong shnong.
U Chief Justice ula ai khublei iaka sorkar jylla, ki bor district, ki nongbishar bad ki nongiasaid ain kiba la treikam shitom ban pynurlong iaka District Session Court naka bynta ban pynduna ki mukotduma ba sahteng bad ban wanrah ia ka jingbishar ba hok naka bynta ki paidbah.
Naka liang u District & Session Judge N.A Khan ula pyntip ba ka District Judiciary kala iakhlad bad ka Executive haka 27 tarik Naitung 2013 ban nang pynkhlain shuh shuh iaka jingbishar bad kala treikam naka ophis Deputy Commissioner West Jaintia hills.
Kane ka District Session Court ka don ha ka jaka ba heh 11.162 acres bad la tei haka jinglut kumba T.35.89 klur. Kane ka Complex ka kynthup ia ka mala ba sha trai duh bad lai tylli ki ka mala ha ka jingheh kumba 93,631 sq.ft (8698.60sq, metrs) kaba don 7 tylli ki Courtroom.
