Shillong, Risaw 15: U Myntri ka Koit ka Khiah u Bah Wailadmiki Shylla ha ka sngi Balang ula plie ia ka National Health Mission Sports Meet ha Nongkseh Sports Ground, Shillong.
Kane ka jingialehkai kaba bun sngi la pynlong hapoh ka mat “Wellness through Sports, Service through Health”, da kaba banjur ia ka jingkongsan ba ki briew kiba ai jingsumar kin don ia ka met kaba koit ba khiah.
Haba kren ha ka jingialang u Bah Shylla ula pynpaw ia ka jingsngewnguh bad ai khublei ia ki nongtrei jong ka NHM kiba la pynlong ia kane ka jingiakob ialehkai. Ula pynapw ia ka jingsngew sarong halor ka jingtreilang ka jongki kum ka kynhun bad ka jingaiti bad ula ong “Kum ki nongtrei ha ka koit ka khiah, ngi iai in mynsiem bad kyntu ia ki paidbah ba kin im ia ka jingim kaba koit ba khiah bad ka rukom im kaba bha. Mynta ka sngi phi lah pyni, ngi leh ia kaei kaba ngi ialap”.
Ula iaroh ruh ia ki nongtrei kiba la kyntiew ia ka koit ka khiah bad ia ka jingbit jingbiang ha ka met ka phad lyngba ki kam kaba ki leh bad ula kyntu ia baroh ki nongtrei ka koit ka khiah ban long kiba khlain bad ka pynthikna ba ka jingtrei met bad mynsiem ka jongki kadei kaba la ai jingithuh bha da ka sorkar.
Katba ka Dr Carol Iangrai, Joint Director of Health Services, kala banjur ia ka jingkongsan jong kane ka jingiakob bad ong “Kane ka jinglum lang ka long kaba sngewtynnad kaba pynkynmaw ba ka koit ka khiah kam dei eh tang bym don ia ka jingpang hynrei ka jinglong kaba pura ha met ka phad, ka bor pyrkhat bad ka longrynnieng baroh kawei” Kala iaroh ruh ia ka jingtrei shitom jong ki NHM ha kaban pynkhlain bad wanrah ia ka jingkylla ha ka jingshakri ha ka koit ka khiah hapoh ka jylla bad ha ka ri ruh kumjuh.
Haba kren shaphang ka jingkiew ka jingpang Non-Communicable Diseases (NCDs), kala ong, “Ki kam ialehkai ki hikai ban long kiba don ia ka akor, ka jingiai shah, ka jingkut jingmut bad ka jingiatreilang kum ka kynhun, kaba ngi donkam ban pynkylla ia ka rukom im ka jong ngi”.
Kala pynpaw ba ka jingkilan met kaba man la ka sngi bad kia kam ialehkai ki iarap shibun ha kaban pynduna ia kitei ki jingma bad ki long kiba kongsan ban iada.
Katba u Bah M. Thangkhiew, Rangbahj Shnong ka Nongkseh bad General Secretary ka Nongkseh Sports Social and Cultural Hub ula ai khublei ia baroh kiba la wan iashimbynta bad ula iawer ia ki ba kin lehkmen ia ka jingitynnad jong ki jaka ia kaba ula ong ba kadei ka jaka kaba don ia ka histori.
Ula pynapw ruh ba ki don 1500 tylli ki longiing bad 7000 ngut ki briew bad ka shnong ka khmih lynti ban kyntiew ia ka bynta ha kaban ai jingshakri ha ka liang ka koit ka khiah.
Katba u Bah Edison Khymdeit, Sports Organising Member bad President DEC, NEAM, EKH, ula ai ka kren pynwai.
Kane ka sports meet kadei da ka jingthmu ban tei ia ka jingiatreilang kum ka kynhun, jingiajan kum shi paralok bad ia ka kolshor ban don ia ka met kaba koi tba khiah ia baroh.
Ia ki jingialehkai la sdang naduh ka 15 tarik u Risae haduh ka 17 tarik u Risaw bad kane ka jingjop ha kane ka jingsdang kala pyni iaka jingkut jingmut ban tei ia ka jingling kaba koi tba khiah hapdeng ki briew kiba don ha ka jingshakri ha ka liang ka koit ka khiah hapoh ka jylla Meghalaya.
