Shillong, Nohprah 17: Kum shi bynta ban kyntiew ia sap ki khynnah skul ha ka kam ialehkai naka liang u MDC ka Jaiaw-Mawprem u bah Paul Lyngdoh hynne ka sngi u la plie paidbah ia ka madan ialehkai Basketball Court jong ka skul Nora Evalyn Higher Secondary School Qualapaty Shillong.
Ha kane ka sngi plie iaka Basketball Court jong ka skul Nora Evalyn Higher Secondary la sakhi lang jong ki pastor ka Balang u Blei ha ryngkat ka jingdon lang jong ki nonghikai lem bad ki khynnah skul jong katei ka shlem ai jinghikai.
Lah ban kdew ba kane ka madan Basketball Court jong kane ka skul ia kaba la plie mynta ka sngi kam dei shuh kaba dang thymmai hynrei kadei ka madan ialehkai ia kaba u bah Paul Lyngdoh u la pynioh ha u snem 2006 haka por ba u bat kum myntri sorkar jylla Meghalaya.
Haba kren ha kane ka sngi na ka liang u bah Paul Lyngdoh u la pynpaw ba um sngew nongwei shuh haba wan ban ia don bynta lang bad kane ka skul namar ba u la ju ia don ryngkat bad kane ka skul ha kiba bun ki khep.
U bah Paul u la bynrap ruh ba ka jingplie biang ia ka madan Basketball Court kadei ka jingshna pynthymmai ia kane ka juh ka jaka kaba la tei nyngkong ha u snem 2006 naka bynta ban pynwandur bad pynitynnad ia kane ka jaka ialehkai.
Ha shwa ban sdang ka jingïalang lyngkot ban plie ia katei ka madan na ka liang u symbud kongsan u Pastor R. Imïong u la pule ia ka ktien u blei bad ialam da ka jingdwai ha ka jingdon lang ryngkat u Pastor A C Moore uba dei peit ia ka iing mane jong ka Balang U Blei ha ka jingdon lang ryngkat u pastor S Kharsyiemlieh lem bad kiwei pat.
