Shillong, Rymphang 25: Ka St John’s Church, Laban Parish ka la ïoh ban plie ïa ka ïingmane jong kawei na ki Balang Shnong jong ka, ka CBC Lawsohtun ha ka 25 tarik u Rymphang 2024 bad la ainam ïa ka ha ka ‘Divine Savior Church’ Lawsohtun.
La sdang ïa kane ka sngi da ka Mass Bakhuid bad ka jingkyrkhu ïa ka ïingmane da u Lyngdoh Sad ka Jylla niam bah Shillong, Most Rev Archibishop Victor Lyngdoh, ha ryngkat ka jingïadon lang u Lyngdoh Nongsharai jong ka Parish, Fr Cresence Khongwir, U Lyngdoh Synrop bad kiwei kiwei ki Lyngdoh ban ïarap ban tyrwa ha ka kñia ka khriam.
La wan sakhi ha kane ka sngi da spah ngut ki paid riewngeit jong kane ka Balang Shnong, ha ryngkat kiwei pat ki para ba ngeit jong ka Parish Laban; ki nongïalam sorkar bapher bapher kiba kynthup ïa u MLA ka thain Bah Ronnie V Lyngdoh, u MDC Bah Michelle Wankhar, ka Myntri Sorkar Kong Ampareen Lyngdoh bad kiwei de ki nongshahkhot sngewbha.
Katkum ka jingïathuh jong ki riew rangbah kane ka balang shnong, la ong ba la buh ïa u mawnongrim ban tei ïa ka ïingmane naduh ka snem 2007 bad ha ki jingtrei barit jong ki parabangeit ha la i jingnoh synñiang barit, ka kam ka la ïaid suki suki.
Dei pat haduh ka jingwan jong u Fr Cresence Khongwir, u Parish Priest ha ka snem 2015 ba u sa shimti ban pynurlong ïa kane ka jingtrei ba la bet symbai da kiba ha shuwa bad da ka jingtrei baradbah bad ka jingaiti ba pura, kane ka jingangnud ka la ïaid stet bad la lah ban pynïeng ïa kane ka ïing khuid ïing kyntang ha kaba la ïoh ban kyrkhu ïa ka ha kane ka sngi.
Ha ka por nohphaisngi pat, la pynbud da ka jinglehniam bad la pynkut ïa ka sngi da ka Variety Programme ba la ïashimbynta da ki paidriewngeit jong ka Parish Laban hi baroh kawei.
