Shillong, Nailar 09: U Anil K Antony, National Secretary bad u National Spokesperson ka BJP ba peit ia ka jylla Meghalaya bad Nagaland, hynne ka sngi Thohdieng, u la pynbna ia ka jingsdang jong ka ‘Har Ghar Tiranga’ Campaign na ophis ka BJP ha Shillong.
Kane ka campaign ‘Har Ghar Tiranga’, ka dei ka dak ban pyni iaka jingsngew sarong bad jingsngew long trai hapdeng uwei pa uwei u nongshong shnong ka ri India, kaba dei ruh ka sienjam bala shim da u Myntri Rangbahduh u Narendra Modi, kaba la jam sha ka lai snem mynta u 2024.
Ha kine ki ar snem ba la dep, ka jingpynlong iaka ‘Har Ghar Tiranga’, kaba la thaw khnang ban ïahap bad ka Azadi ka Mahotsav ne ka jingrakhe ïa ka snem ba 75 jong ka jinglaitluid, ka la paw kum ka jinglehkmen kaba heh tam jong ka jingieit jaidbynriew ha kylleng ka ri.
Haba kren ha kane ka sngi, u Anil K Antony u la ong, “Ha ka por kaba slem bha, ka jingiadei jong ngi bad la ka jong ka lama ri ka long kaba thikna bad kaba jngai. Hynrei kane ka jingpyrshang jong u Myntri Rangbahduh badonburom jong ngi u Narendra Modi, ka la pynkylla mynta ia ka jingiadei jong ngi bad ka Lama lai rong sha ka kam synshar paidbah, ka kam paidbah, kaba pynthikna ia ka jingiadei shimet bad uwei pa uwei u nongshong shnong jong ka ri. Mynta u snem ruh, u Myntri Rangbahduh u la ai ka jingkhot kaba shai bha ïa uwei pa uwei u nong India ban pyni da ka jingsngew sarong ïa ka lama ri ha la ki ïing ki sem bad ha kano kano ka jaka kaba lah.”
“Ha kine ki sngi yn pynlong daki prokram bapher bapher ha kylleng ka Ri ha ryngkat ki tamasa rakhe iaka jinglaitluid kaba shisha kaba ïashim bynta lang. Hapdeng ka 11 haduh ka 14 tarik u Nailar baroh ki assembly konstitwensi ha ka ri kin sakhi ia ki Tri-ranga yatras ha ka dur jong ki bike rally, ki marathon, ki padyatras bad kiwei kiwei. Ngi kyrpad ïa baroh ki nongshong shnong ha kane ka jylla Meghalaya ba kin ïashim bynta lang ha baroh ki prokram da kaba bun briew” ula ong.
U Anthony ne u la ong ruh, “Ka Party kan pynkupburom ia baroh ki nongialeh laitluid ha ka 13 tarik u Nailar, ka thup kaba jrong bad kaba ai mynsiem, kaba kynthup ruh ia ki nongialeh laitluid na Meghalaya kum u Tirot Sing, u Kiang Nongbah bad u Pa Togan Sngma napdeng ki kiwei pat. Ha ka 14 tarik u bnai Nailar yn pynlong ia ka jingleh kynmaw burom ban iathuh biang ia ki jingjia ba shyrkhei jong ka jingphiah. Lyngba kane ka prokram, ngi kwah ban phah ia ka khubor sha ka Congress ba la ialam da u Rahul Gandhi bad kiwei kiwei ki seng pyrshah ba kin sangeh noh ia ka jingpyrshang jong ki ban pyniakhlad ia ka jaidbynriew halor ka nongrim jong ka niam, ka jaitbynriew bad ka jaitbynriew. Ngi kyrpad ruh ia ki paidbah ba kim dei ban ngop ha kum kane ka sain pyrthei kaba pynpait pynpra, namar ki agenda kiba pynpait pynpra ki wan ryngkat bad ka jingjulor kaba khraw bad ka jingduhnong. U Myntri Rangbahduh badonburom u la ai ka jingkhot jong ka sabka saath, sabka vikaas bad ngi don ha ka lynti ban long ka jaidbynriew kaba la kiew ha u snem 2047. Ngim lah ban ailad ïa ka saiñ pyrthei kaba pynïapher kan pynthut ïa ka thong jong ngi.”
“Na ka bynta u Myntri Rangbah, ka thaiñ shatei lammihngi ka dei ka bynta kaba kyrpang bad la pynlut 6 lak klur na ka bynta ka jingpynïasoh bad ka roi ka par, ban pynthikna ïa ka jingïatylli kaba pura jong ka thaiñ shatei lammihngi bad ka ri baroh kawei. Ka thain shatei lammihngi ka dei mynta ka khyrdop jong ka India sha ka thain shatei lam mihngi bad ki ri ASEAN bad ka juk thymmai jong ka jingroi jingpar ka la mih ha ki jylla ka thain shatei lammihngi. Ngi kyrpad ia baroh ki nongshong shnong jong ka thain shatei lammihngi ban pynher ia ka lama ri ha ki iing ki sem jong ki ha ka 15 tarik u bnai Nailar, to ngin pynlong ïa kane ka jingïalang kum ka jingïakhih paidbah jong ka jingieid ri,” la pynkut u Anil K Antony.
