Shillong, Naiwieng 14: U Myntri Rangbah ka jylla u Conrad K Sangma hynne ka sngi ula plie paidbah iaka Shillong International Centre for Performing Arts & Culture (SICPAC) ha Mawkasiang, ia kaba ki paidbah ka jylla kila angnud la slem bha ban ioh ia kane ka rynsan ban pynlong ia ki prokram bapher bapher.
The iconic Shillong International Center for Performing Arts & Culture (SICPAC) inaugurated today will give our youth, artists & performers from Meghalaya a grand platform to show their many gifts & talents@narendramodi @kishanreddybjp pic.twitter.com/HRpvmQ7kt4
— Conrad Sangma (@SangmaConrad) November 14, 2022
Ha kane ka jingplie ia ka SICPAC la iadonlang u Symbud Myntri Rangbah ka jylla u Bah Prestone Tynsong, u Myntri ka tnad Arts & Culture u Bah Sanbor Shullai, u Myntri ka tnad PHE u Bah Renikton L Tongkhar, u Secretary ka NEC u Moses Chalai, u Chief Secretary ka jylla u Bah Donald P Wahlang, ki MLA, MDC, ki heh ophisar sorkar bad da ki spah ngut ki khynnah skul.
Haba kren kum u kongsan u Conrad Sangma ula ong, ka SICPAC kan long ka rynsan kaba thymmai bad kaba paka ban pynlong iaka tem ka put ne kino kino ki prokram kiba heh.
Ula ong kane ka jaka, kan long kum ka jaka ban pynlong ia ki prokram kiba heh la ka long haka rwai ka siaw, ka tem ka put, ka jingpyninam iaka kolshor ne ban pynlong iaki Film Festival bad khamtam eh ha kaban pyninam iaka rukom thain jingthain ki paid ka thain shatei lam mihngi.
Grateful to Sh. @kishanreddybjp Hon’ble Union Minister for @MDoNER_India and Sh. @MundaArjun Ji, Hon’ble Union Minister for @TribalAffairsIn for funding this state-of-the-art project which will encourage our artists in our music-loving city and State. pic.twitter.com/ZCYA39QhK8
— Conrad Sangma (@SangmaConrad) November 14, 2022
U Conrad ula ong, kum ka International Convention Centre kaba la pynbiang ia ki jingdonkam baroh, kan long ruh kum ka rynsan ban ai jinghikai ia ki samla ka jylla bad ka thain shatei lam mihngi haka rwai ka siaw, ka tem ka put bad kumta ter ter khnang ba kan long pat ka lad ia ki samla ban iohkam iohjam.
Ula ong, baroh shi katta ym shim la lah ban pynlong ia ki Concert kiba heh namar ka jingbym don ia ka jaka kaba biang, hynrei da ka jingdon ka SICPAC yn lah ban pynlong ia ki Concert kiba heh kiban wan tem da ki kynhun kiba pawnam ha kylleng ka pyrthei.
Ka SICPAC kadei ka jingtei kaba nyngkong bad kaba heh tam haka jylla Meghalaya kaban don bun tam ia ki jakashong naka bynta ki nongpeitkai bad kan ai jingmyntoi ruh ia ki kynhun rwai bad kynhun tem jong ka jylla.
La tei iaka SICPAC ha ka jinglut jingsep kaba kot T. 151.33 Klur da ka jingbei tyngka jong ki tnad ka sorkar pdeng kaba long T.136.20 Klur bad T.15.13 Klur daka sorkar jylla.
Ha katei ka SICPAC ka don ka Multipurpose Theatre kaba don 1739 tylli ki jakashong naka bynta ki nongpeitkai, ka Little Theatre kaba don 302 tylli ki jaka shong, ka Black Box Theatre kaba don 574 tylli ki jakashong, ka Open-Air Theatre kaban ngiam haduh 15,000 ngut ki briew.
Nalor kane ka don ruh iaka Art Gallery, Sky Theatre, Exhibition Space, VIP Enclosure Area, Auditorium Hall kaba don iaka rynsan kaba lah ban shad pyllun, VIP Banquet Hall, VIP Lounge, VIP Restroom, Tribal Museum, Media Centre, Television & AV Studio, Library, Food Court bad ki jaka treikam.
