Shillong, Nailur 11: Ki Pulit jong ka Tura, West Garo Hills kila plie iaka kawei ka Mini Centre ban lum ia ki jaiñ ki nep kiba la synniang da ki paidbah ka thaiñ kum shi bynta ban ai sha kiwei pat kiba donkam jain.
Ia katei ka centre la buh ha ka khyrdop jongka Police Reserve Tura, ha kaba kino kino ki briew ki lah ban leit noh synniang ia ki jaiñ ne kino kino ki mar na ka bynta ban ai kylla sha ki briew kiba donkam ia ki.
Lah ban kdew ba katei ka jingthmu kala iaid mynta la katto katne bnai bad kino kino ki briew ki lah ban leit ai ia ki jaiñ kiba kim phong shuh ne ki tiar kiba kim pyndonkam shuh bad kino kino ki briew kiba donkam pat ki lah ban shim na katei ka jaka.
Ia katei ka sienjam la sdang ha ka por ba u Vivekanand Rathore u dang long u Superintendent of Police bad haduh mynta ka dang bteng ban treikam hapoh ka jingkhmih bad jingpeit jong ki pulit ka West Garo Hills.
Katei ka Donation Centre ka treikam baroh 24 kynta ha ka por ba sdang nyngkong hynrei hadien ba la sakhi ba ha ka por mynmiet, ki briew ki shlei ha katei ka jaka khamtam eh ki nongkhrong bad kito ki bym don jaka sah. Kumta la pynsangeh noh ban plie haka por mynmiet bad la plie tang haka por mysntep bad ha ka por janmiet.
Kane ka jingthmu ka long ban iarap ia ki para briew bad ka thong kaba hakhmat ka long ban iarap ia ki briew kiba donkam ia katei ka jingiarap da kaba pyndonbynta hi da ki paidbah ban iashimbynta ha katei ka kam ba bha.
Watla kam don kano kano ka jingpyndap ia ki kot ki sla ne ban shah kylli jingkylli, kino kino ki riewpaidbah ki lah banleit ban noh synniang ia ki jaiñ jongki ha kano kano ka por bad kino kino kiba donkam ki lah ban shim ia kitei ki jaiñ ban ioh ban pyndonkam.
Kane ka sienjam jong ki pulit ka long ka nuksa kaba bha tam bad ruh ka nuksa jong kawei ka jingkren, “Ka mar bym donkam shuh jong uwei u briew, ka dei kaba kordor ia kiwei pat”.
