Shillong Risaw 06: Ka Director jong ka tnad Fisheries ka Kong A.L. Mawlong, hynne ka sngi kala plie paidbah iaka Backyard Mini RAS (Re-circulatory Aquaculture System) bad Backyard Ornamental Fish Rearing Unit ha Laitkor Rngi Wahkdait bad ha Mawlai Nongkwar.
Ka Kong Mawlong kala pynpaw ba ka Backyard Mini RAS & Backyard Ornamental Fish Rearing Unit kadei kaba nyngkong eh ka rukom ri ia ki dohkha kaba la don bynta lang bad ai jingiarap daka tnad Fisheries jong ka jylla lyngba ka skhim ka sorkar pdeng kaba la tip kum ka PMMSY ne ka Pradhan Mantri Matsya Sampoda Yojana 2020-21.
Ka la ai khublei bad iaroh ia kiba ioh jingiarap lyngba katei ka skhim kata iaka Kong Solidarity Lyngdoh bad u Bah Paul L Pynrope kiba la sdang ia kitei ka projek ban ri ia ki dohkha.
Ka Director kala ong, ba ka Mini RAS kadei ka rukom ri dohkha da kaba pyndonkam ia ki kor ki bor ha kaba lah ban saiñdur bad pynkhuid biang ia ka um bad ia ki jaboh. Ia kane ka project lah ban buh shadien ïing ha kaba ym da donkam than iaka jaka kaba heh ne ia ka um haba ianujor iaka rukom ri dohkha ha ki pung kaba donam iaka jaka kaba heh bad shibun ka um.
Kala ong, kane ka rukom ri dohkha ka pynmih kumjuh hi iaki dohkha haba ianujor bad ka jingri dohkha ha ki pung kiba heh bad kadei ka kabu kaba ki nongrep kidei ban shim ia kane ka skhim ban pyntreikam iaka ha ki ïing jongki. Ia kane ka rukom ri dohkha lah ruh ban leh watha ki jaka kiba don ha sor khamtam haba ka jingdon iaki jaka ka duna bha.
Ka Director kala pynshlur ia ki nongioh jingmyntoi ba kin shimkhia bha ha kaban pyniaid shakhmat ia katei ka projek khnang ba kan long kum ka nuksa ia kiwei pat.
Ka la ong, ba ka Backyard Ornamental Fish Rearing Unit kadei ka sienjam kaba bha eh, kaba la shim da ki nongioh jingmyntoi bad kala kyntu iaki ba kidei ban ialeh ruh ban ri ia ki dohkha tynrai kiba don bun jait haka jylla bad kadei ruh ka lad ban kamai jakpoh.
Nalor kane, kala kyntu ia ki nongioh jingmyntoi ba kin iasyllok bad iatreilang bad ki nongtrei jongka tnad Fisheries khnang ba katei ka projek kan long kaba iaid beit bad kaba jop.
Ha katei ka jingplie paidbah ia katei ka projek la iadonlang ka Suprintendent of Fisheries jongka East Khasi Hills Shillong ka Kong Hameka Papang bad kiwei kiwei ki heh ophisar jong katei ka tnad.
