Nongpoh, Risaw 03 : Ka synjuk ki nongsumar dawai kynbat ka Ri-Bhoi kiba don ha ka shatri jong ka Ri-Bhoi Traditional Healer Association (RBTHA) ha ka sngi Nyngkong, kala plie paidbah ia ka hospital sumar dawai kynbat bala tip kum ka Meghalaya Traditional Healing Clinic ha Pahamsyiem, Nongpoh.
Ia kane ka jaka sumar dawai kynbat la plie paidbah da ka Myntri ka Koit ka Khiah Kong Ampareen Lyngdoh ha ka jingiadonlang u MLA ka Nongpoh Bah Mayralborn Syiem, MLA ka Umsning Dr C Lyngdoh lem bad kiwei kiwei.
Kane ka hospital sumar dawai kynbat ka dei kaba la tei ha ka jinglut kumba 8 lak tyngka, kaba la bei lyngba ka Tnad Bio-Resources Development Centre, Shillong.
Ka kong Ampareen Lyngdoh haba kren kum ka kongsan kala pynpaw ka jingsngewkmen kaba khraw ban iohi ba katei ka jaka sumar kala ïeng ha katei ka jaka ban ai ïaka jingshakri sha ki paidbah bad ban pynkoit ïaki jait jingpang bapher bapher lyngba ka rukom sumar tynrai.
Ka Myntri kala kyntu ruh ïaka Association ba kan lum kan lang ïa baroh ki nongsumar tynrai ba kin don lang ha kajuh ka shatri khamtam ban pynim biang ïa katei ka rukom sumar tynrai.
Ka kong Ampareen kala pynpaw ia ka jingkongsan ka jingkhuid jingsuba haka rukom sumar ban ioh ïaka jingithuh, khnang ba ki paidbah sa shisien kin phaikhmat biang sha katei ka rukom sumar bad ban dih da ki dawai kynbat ki bym don jingktah ïaka met jong u briew.
Ka Myntri kala kular ruh ba kan sa shimkhia ruh ban ïakren bad ka BRDC ba kan dang pynheh shuh shuh ïa katei ka jaka sumar ban ai ka jingshakri sha ki paidbah haka liang ka koit ka khiah, kala bynrap.
U President ka RBTHA Bah Jasper Manih u la pynpaw ba kane ka dei ka jingphohsniew jong baroh ki nongsumar khasi ban dang pynim ïaka rukom sumar tynrai khamtam ban pynneh pynsah ruh ïaki dawai kynbat ha kaba kum ka kynhun hi kam kwah ba kane ka jinghikai da ki longshuwa man shuwa halor ki dawai kynbat bad ki rukom sumar tynrai kin duh kin dam noh hynrei ban dang trei shitom ban pynneh pynsah ïa katei ka rukom sumar.
Kiwei kiba iadonlang ki kynthup ia u Bah Balajied Ranee MDC ka Nongpoh, Gunanka DB Joint Secretary ka sorkar jylla bad Member Secretary ka BRDC,, Ellington Syiem Secretary ka RBTHA lem bad ki nongsumar tynrai na kylleng ka Ri-Bhoi bad ka jylla baroh kawei.
