Leit jngoh ia ka Law Kyntang bad Khasi Heritage Village ha Mawphlang
Shillong Kyllalyngkot 16: Ka President ka ri India Draupadi Murmu hynne ka sngi Ba-ar kala plie online ia ka surok Rongjeng-Mangsang-Adokgre bad ia ka surok Mairang-Ranigodown- Azra nalor ka jingbuh Mawnongrim ban tei iaka Shillong Peak Ropeway bad ki jaka sah jong ki nongjngohkai ha ka shnong Kongthong, Mawlyngot bad Kudengrim, ha ka jingialang kaba la long ha Mawphlang, East Khasi Hills.
Ha kane ka jingialang la iadonlang u Myntri Rangbah ka jylla u Conrad K Sangma, ki Symbud Myntri Rangbah ka jylla kiba kynthup ia u Bah Prestone Tynsong bad u Bah Sniawbhalang Dhar, ki myntri sorkar, u Chief Executive Member ka KHADC u Bah Pyniaid Sing Syiem, ki MDC, ki heh ophisar bad da ki hajar ngut ki paidbah.
Haba kren haka jingialang ka President ka ri, kala ong, “Ka Law Kyntang ka dei kaba la don palat 700 snem bad kane kala khring ia ki paidbah bad ia ki nongjngohkai na kylleng ki ri bad ka pyni iaka jingstad jong ki longshwa manshwa kiba la sngewthuh lypa bad pyndonkam iaka kolshor ban pynneh pynsah ia ka mariang. Ngi dei ban shim ia ki sienjam ban pynneh ia kum kine ki khlaw”.
Ka President kala pynpaw iaka jingsngewtynnad ba ka Meghalaya kala trei shitom ha kaban pynlong ia la ka jylla kum ka Model State bad kaba shim ia ki lad ki lynti ha kata ka rukom ba ka roi ka par ka iaid ryngkat lang bad kane ka juk kaba mynta ryngkat bad ka pynneh iaka riti dustur tynrai.
“Da ka jingwan tuid bha ka FDI, ka khaii pateng kala kiew bha bad ka Meghalaya kala sdang ban kylla long kum ka nongialam ha ka roi ka par bad kala pynmih iaka khana kaba ai mynsiem bha” ong ka President bad kala kren ruh iaka jingpynmih ia u Lakadong bad ia u sohshan ha kaba ka jingdawa ka long kaba jur bha.
Kala ong, naduh ki por hyndai hynthai ki paid riewlum kila pyndonkam iala ka jingstad tynrai, ka kolshor bad ia ka niam ka rukom ha kaban pynneh pynsah iaka mariang. Ka rukom im ki riewlum ka long kaba biang bha ban leh ia ki ‘Case Studies ne ki jingpule bniah halor kumno ka don ka jingiadei hapdeng ki briew bad ka mariang” kala ong.
“Ka long kabala buh ha ki jingthoh ba ki longkmie ki long u klongsnam ha ka jingshimkhia ban pynneh pynsah. Ki longkmie riewlum kila pyni ia ka lynti ha kaban iada ia kamariang bad ban sam lem iaka jingnang jingstad ka jongki ban im bad ban pynsuk ha kaba iadei bad ka jingktah jong ka jingkylla ka suinbneng” ong ka Murmu.
Kala pynpaw iaka jingdonkam ban buh ha ki jingthoh jingtar ia karukom leh tynrai ha kaba iadei bad ka jingpynneh pynsah bad ban pyniaid bad ban shim ruh iakilad ki lynti na ka bynta ban pynneh shi rta bad ban pule ia ka jingstad jong ki longshwa halor kiba bun ki jingeh kaba kila lah ban pynbeit ban pynneh pynsah iaka pyrthei ha ryngkat bad ki jingdon jingem ki jongka kiba kyrhai na ka bynta kipateng ban dang wan.
Ka President kala kren ruh ha kaba iadei bad ki kam pynroi bad ki projek ki bapher kiba la plie ha kane ka sngi, ha kaba kala pynpaw iaka jingngeit skhem ba kitei ki projek kin kyntiew iaka leit ka wan bad kan pynlong ia ka Meghalaya ba kan jam shaphrang.
Katba u Myntri Rangbah ka jylla u Conrad K Sangma ula pynpaw ka jingsngewnguh ia ka President kaba la wan jngoh iaka jylla bad ban plie iaki projek ki bapher bad ula batai ba ka jingthmu jong ka Rural Tourism ne kam jngohkai ha ki thain nongkyndong ka long ban plie lad ia ki paidbah ka Meghalaya ym tang ba kin pynneh pynsah iaka rukom im ka jongki hynrei ban pyninam ruh sha ka pyrthei baroh kawei, ha ka nongrim jong ka jingpynneh pynsah bad ka kam jngohkai ha ki nongkyndong.
U Myntri Rangbah ula pynpaw ruh iaka thong jong ka sorkar jylla ba ha u 2028 yn pynlong ia ka Meghalaya kaba kiew ha ka ioh ka kot kaban kynjoh sha ka 10 Billion US Dollar bad ka kam jngohkai kum ka lad kaba kongsan kaba lah ban pynurlong ia katei ka thong bad ban thaw iaka lad ba ki paidbah kin lah ban kamai bad ban pyninam iaka jingitynnad jong ki jaka shaka pyrthei baroh kawei.
U Conrad ula pynpaw ruh ia ki sienjam kiba ka sorkar jylla kala shim na ka bynta ban kyntiew iaka ‘Adventure Tourism’.
Ula ong ruh ba Meghalaya kala ialam nakhmat ha kaban pynneh pynsha 76% ia ki khlaw ki btap kaban iarap ha kaban iakhun iaka jingkylla ka suinbneng bad ula ai khublei ia ka imlang sahlang kiba la ialam na khmat halor kane ka bynta ban pynneh pynsah bad ban iada ia ki khlaw ki btap.
U Myntri Rangbah ula pynkut ruh da kaba ong ba ha kine kiar sngi jong ka jingwan ka President sha ka jylla kala long kaba ai mynsiem bha ym tang ia ki nongialehkai, ki samla, ki Self-Help Group jong ki longkmie hynrei na ka bynta baroh ki 38 lak ngut ki nong Meghalaya kila lehkmen halor ka jingjop ban ioh iaka President kaba nyngkongduh kaba mihkhmat ia ki riewlum.
Hashwa kane, ka President kala leit ban jngoh iaka Khasi Heritage Village ha kaba kala ioh ban iakren bad ki MDC jong ka KHADC bad ki khlieh jong ka Hima Mawphlang bad la pyni ruh ia ka rukom siaw jong ka shnong Khongtong.
