Shillong, Risaw 27: Ka Luzia’s Kitchen, kaba la seng da ka Luziana Wahlang, kala jam sha uwei pat u mawmer hynne ka sngi Nyngkong da ka jingplie iaka dukan ha Mawlai Phudmawri, Shillong.
Ia kane ka dukan la plie da ka Saloni Verma, ka Executive Director jongka Meghalaya Basin Management Agency (MBMA), ha ka jingdonlang u Rev. W. S. Majaw, ki bahaiing bahasem bad ki dkhot jong ka kynhun PRIME.
Ka Luzia’s Kitchen kaba la seng lyngba ka PRIME Meghalaya bad shi bynta jong ka Cohort 5, kalba a sdang ia ka kam khaii ha u snem 2020 ha Lummawbah. Kala sdang ia ka jingpyniaid iew ia ki jingbam disha, ki jingbam Khasi, Korean, bad Chinese bad kala sdang ban pawnam ha ki riewieid bam ha ka thain.
Nalor ka kam die bam, ka Luzia’s Kitchen ka iengskhem ruh ha kaban wanrah ia ka jingkylla ha ka imlang sahlang. Kane ka kynhun kala ai ia ka kamai kajih bad ai jinghikai pyntbit ia la ka kynhun kaba dang kiew shaphrang da kaba ai ia ka kam ban trei pura bad ban trei tang shipor, da kaba pynkup bor ia ki samla bad ban kyntiew ia ka jingaikam aikam hapoh ka shnong ka thaw.
Kane ka jingplie ia ka dukan ha Mawlai kadei sa kawei pat ka sienjam jong ka jingiohi jngai jongka Luzia’s Kitchen ban pyniar ia ka kam ban noh synniang sha ka ioh ka kot jong ka shnong ka thain.
“Nga kwah ban ainguh ia u Blei uba la iai bteng ban theh ia ka jingkyrkhu ha ngi. Mynta haba ngi plie sa ia kawei pat ka dukan jong ka Luzia’s Kitchen, ka mynsiem ka jong nga ka dap da ka jingsngewnguh. Ka jingiaid lynti kam shym la long kaba suk, ngi lah mad ia ki jingtynjuh, jingeh bad ki khyllipmat ha kaba kala poi u pud ba ngi mut ban kynran dien noh kum ka jingbym don lad shuh. Hynrei da ka jingkyrkhu u Blei bad lyngba ka jingtrei shitom bad ka jingkyrshan, ngi lah iaid shakhmat. Ha man la ka shi kam, man ba ngi shong miet, man la ka jinglen lade kala ialam ia ngi sha kane ka sngi kaba sngewtynnad. Ngi jam shaphrang da ka jingkyrmen ban pdiang sngewbha ia phi, ban shakri ia phi bad ban iaid ha ka lynti ryngkat lang bad phi” ong ka Kong Luziana Wahlang.
