Shillong, K’lyngkot 05 : U Sordar ka Raid Lyngkhat hynnin ka sngi balang, ula plie paidbah biang ia ka Iew khappud ha Lyngkhat, kaba la khang khyrdep naduh ba wan lynshop ka khlam Covid-19 ha Jylla bad ki Ri ka pyrthei.
Ia kane ka Iew Khappud la plie ha ka jingiadon ryngkat ki Rangbah Shnong jong ki Shnong bapher bapher ka Raid Lyngkhat bad ki Nongkitkam ka seng Ri-War Development Organisation (RWDO) nalor ki paidbah ka thain Riwar kiba shongiew bad wan iew ha kane ka jaka.
Ia kane ka Iew khappud la sdang khang naduh u bnai Lber 2020 hadien ka jingwan lynshop ka khlam Covid-19. Ka jingkhang khyrdep ia kane ka iew kala ktah jur shi katdei eh ia ka khaii ka pateng ka kamai ka kajih jong ki paid ka thain Riwar kiba imja na kane ka Iew.
Ka Iew Lyngkhat ka dei ka pliang ja jong ka thain Riwar ban pyndap bad bsa ia kiba bun ki longiing longsem. Ka jingplie biang ia kane ka Iew kala ai jingkyrmen sa shisien pat ia ki paidbah ban kamai jakpoh na ka iadie iathied ia ki mar ki mata ha kane ka Iew.
Ka seng RWDO ka pyntip sha ki paidbah kiba leit iew leit hat bad kiba wan die jingdie ha Iew Lyngkhat ba kin iawan shong iew noh ha manla ki sngi iew Lyngkhat khnang ban pynlong biang ia kane ka Iew kaba im.
Ka seng kala pynpaw ia ka jingsngewnguh ba na ka liang u Sordar ka Raid Lyngkhat bad ki Nongkitkam ka Raid, kila shimkhia kyrpang ban ioh plie biang ia kane ka Iew na ka bynta ka jingmyntoi kiba bun balang.
